Izina Tecno rimaze kumenyekana muri Afurika yose ku buryo hari aho ushobora kugera wavuga telefone igendanwa, akaba ariryo rihita riza mu ntekerezo za benshi.

Tecno ikorerwa mu Bushinwa nta duka na rimwe igira muri iki gihugu

Telefone za Tecno zikorerwa mu Bushinwa n’uruganda rwa Transsion, runakora izindi zizwi zirimo Itel na Infinix. Ariko nubwo uru ruganda ari rumwe mu zikomeye z’Abashinwa, biragoye ko n’aho uru ruganda rukorera muri Shenzhen wahita uhibwira, kuko rwafashe inzira itandukanye na ngenzi zayo nka Huawei na Xiaomi, zo zatangiriye mu Bushinwa ahubwo zikagukira mu mahanga.

Transsion yo yashinze ibirindiro muri Afurika, ndetse nta na gahunda ya vuba yo gukorera mu Bushinwa. CNN ikaba igaragaza ko nubwo izi telefone zubatse izina kuri uyu mugabane zihigitse izindi zikorwa n’inganda zikomeye nka Samsung na Apple, nta duka na rimwe ushobora kubona ricuruza Tecno mu Bushinwa.

George Zhu washinze Transsion avuga ko igitekerezo cyaje ubwo yazengurukaga Afurika ashinzwe ubucuruzi mu kindi kigo, agasanga uyu mugabane ukeneye telefone zawo zihariye, mu 2006 atangiza Tecno ahereye muri Nigeria.

Ni igitekerezo cyajane na politiki y‘u Bushinwa yo muri za 2000, yashishikarizaga ba rwiyemezamirimo b’Abashinwa gushoka amahanga bagashakao amahirwe y‘ishoramari, bakubaka imikoranire na bagenzi babo muri Afurika.

Icyo gihe abatunze telefoni mu Bushinwa bariyongeraga cyane, mu gihe muri Afurika byagendaga gahoro, gutunga telefoni bakabifata nk’umurimbo kandi ugasanga bigenewe abifite.
Urebye n’uyu munsi, imibare ya 2018 igaragaza ko abakoresha telefoni igendanwa mu Bushinwa ari 97% mu gihe muri Afurika ari 29%.

Icyo gihe ngo banasanze abantu benshi muri Afurika bafite simcard nyinshi bahinduranya muri telefone imwe, Tecno ishyira imbaraga mu gukora izijyamo ebyiri icyarimwe.

Ibyo byaterwaga ahanini no kuba muri Afurika hari imirongo minshi y‘itumanaho nyamara bitoroshye ko ihamagarana ku giciro buri wese yigondera.

Visi Perezida wa Transsion, Arif Chowdhury, yanavuze ko usanga camera za telefoni zikundwa cyane muri uyu mugabane.

Ati “Camera zacu zisanisha cyane n’imiterere y’uruhu rwirabura, ku buryo usanga amafoto acu aba ari meza cyane. Ni imwe mu ibikorwa byacu bitera imbere.”

Tecno yaguye amashami itangira gukorera mu bice byinshi bya Afurika birimo n’u Rwanda, indimi nka Ahmharic, Hausa n’Igiswahili byongerwa mu zishobora gukoreshwa byoroshye kuri telefone za Tecno.

Kubera ibibazo by’amashanyarazi kandi byibasira ibihugu bya Afurika ku buryo hari aho asaranganywa bamwe bakamara igihe batayafite, uru ruganda rwakoze ibishoboka rushyira ku isoko telefoni zibika umuriro igihe kinini.

Transsion kandi yakemuye ikibazo cy’ibiciro aho usanga nyinshi muri telefone za Tecno, Infinix na Itel zigura hagati y’amadolari 15-200.

Yanazanye udushya na porogaramu zihariye ku banyafurika zirimo BoomPlay ikoreshwa n’abasaga miliyoni 32 bumva umuziki; yakozwe n’umunya-Nigeria Oye Akideinde mu 2015. Iyi ikora byoroshye, nyamara iteye nka Spotify na iTunes zo muri telefoni z’izindi nganda.

Nubwo Raporo ya African Business magazine igaragaza ko mu 2017/18, Tecno yari iya karindwi mu gukundwa ivuye ku mwanya wa 14 mu gihe Samsung ari iya kabiri, Apple ikaba iya gatanu; ntibiyibuza kuba yihariye kimwe cya gatatu cy’isoko rya telefoni muri Afurika.

Mu 2017 kandi Transsion yinjiye ku isoko ry’u Buhinde, aho Tecno imaze kwigarura 5% bya telefone zigurishwa, igateganya no kujya mu bihugu birimo u Burusiya, Indonesia na Bangladesh, ariko ikaba nta gahunda yo gutangira gucuruza telefoni zayo mu Bushinwa nubwo uru ruganda rufite icyicaro ahitwa Shenzen, mu gice kibamo inganda zikomeye.

Leave a Reply