APR Fc ifite umukino na Etincelles fc uyu munsi kuwa kabiri, yaraye ikoze imyitozo ya nyuma ku mugoroba w’ijoro rya cyeye kuri Stade umuganda.

APR FC imaze iminsi i Rubavu irakina na Etincelles fc uyu munsi

Shampiyona y’umupira w’amaguru mu Rwanda Azam Rwanda premier league igeze ku munsi wayo wa Gatanu. APR FC nyuma yo gukura amanota atatu kuri Marines FC, uyu munsi i Rubavu irongera ikine n’ikipe ya Etincelles FC.

APR FC imaze iminsi ine mu karere ka Rubavu, nyuma yo gukina na Marines FC yagumye i Rubavu ikomeza kuhitegurira uyu mukino ugomba kubahuza na Etincelles FC uyu munsi kuwa Kabiri saa cyenda n’igice kuri stade Umuganda.

Nyuma y’imyitozo umutoza Petrović yatangaje ko biteguye uyu mukino neza, yagize ati;” ku ruhande rwacu nka APR FC twiteguye neza uyu mukino, tumaze iminsi inaha kuva twakina na Marines ntitwatashye kuko iminsi y’iyi mikino yombi yasaga niyegeranye, bityo duhitamo kuguma inaha kugira ngo tuzagendere rimwe.”

Dr Petrović kandi yatangaje uko yabonye ikipe ya Etincelles FC, yagize ati;” Etincelles n’ikipe nziza urabizi ko na mbere y’uko dutangira shampiyona twakinnye nabo umukino wa gishuti, ariko naho shampiyona itangiriye Etincelles nayibonye ikina na Rayon Sports umukino wabo wa mbere, nabonye ari ikipe nziza n’ikimenyimenyi iheruka gutsinda AS Kigali rero urumvako ari ikipe yo kwitondera.”

Kugeza ubu ikipe ya Etincelles FC ifite amanota atatu yabonye ubwo yatsindaga AS Kigali ku munsi wa Kane wa shampiyona, mu gihe ikipe ya APR FC bazaba bahanganye yo ifite amanoto cumi n’abiri ari nayo iyoboye urutonde rwa shampiyona.

Imikino y’umunsi wa Gatanu wa Shampiyona:

Kuwa kabiri tariki 6 ugushyingo 2018

Etincelles FC vs APR FC (Stade Umuganda)

Mukura VS vs AS Kigali (Stade Huye)

Kuwa Gatatu tariki 7 ugushyingo 2018

Gicumbi FC vs Amagaju FC (Stade Gicumbi)

Sunrise FC vs SC Kiyovu (Nyagatare grounds)

Kuwa kane tariki 8 ugushyingo 2018

Espoir FC vs Kirehe FC (Stade Rusizi)

Rayon Sports FC vs Bugesera FC (Stade de Kigali)

AS Muhanga vs Marines FC (Stade Muhanga)

Police FC vs Musanze FC (Stade Kicukiro)

Leave a Reply