Mu mpera z’icyumweru gishize Dr Paul Gitwaza yashishikarije abasore n’inkumi kwifata nka Maliya na Yozefu bavugwa muri bibiliya.

Dr Paul Gitwaza arasaba urubyiruka kwitwara nka Maliya na Yozefu bo muri bibiliya

Apôtre Dr Paul Gitwaza uyobora Itorero Zion Temple Celebration Centre na Authentic Word Ministries yanenze abasore n’inkumi badategereza umunsi w’ubukwe ngo bashyingiranwe ahubwo bagasambana, rimwe na rimwe bagatwara inda mbere y’igihe, ababwira ko baba bari kwihemukira bakihagarikira imigisha iva mu ijuru.

Dr. Paul Gitwaza agaruka ku myitwarire y’abitegura gushakana muri iki gihe, Gitwaza yavuze ko bamwe batajya bategereza igihe cyagenwe cyo gukora imibonano mpuzabitsina ahubwo bagahitamo gukora ibidakwiriye igihe kitaragera bikabagusha mu cyaha.

Abigarukaho yagize ati: “Ibi biratangaje kubona abana b’abakobwa n’abahungu muri ibi bihe aho gutegereza baterana inda igihe kitaragera…aho gutegereza ikiva mu ijuru kirimo umugisha w’Imana bakiyaranja. Abakobwa n’abahungu bitegura kurushinga…kuki ubenguka umuhungu wawe…umukobwa wawe warangiza ugatangira kumukorera ibidakwiriye hakiri kare…umujyana ahantu hadakwiriye umukoresha ibyaha kandi azaba umugore wawe?”

Gitwaza yakomeje avuga ko mu gihe cyose abakundana basambanye, ngo baba bari kwihemukira kuko baba badafatanyije n’ijuru ngo ribasohoreze amasezerano binyuze muri Mwuka wera. Gitwaza yavuze ko umugisha w’Imana uba urimo ibice 2 aribyo: igice cy’isi n’igice cy’ijuru.

Mu gusobanura ibyo bice byombi, Dr.Gitwaza yavuze ko imigisha igaragarira amaso y’umuntu ayibona akoresheje ibiri ku isi ariko ngo biba byahereye muby’umwuka.

Abantu rero bakora ibyaha byubusambanyi kabone nubwo baba bakundana, ngo hari ubwo bashobora kwihagarikira imigisha ikomoka mu ijuru kandi ngo iyo umusore ateye umukobwa inda, ni bwo batangira kubona ingaruka zo kutumvira ijambo ry’Imana.

Umushumba Dr. Gitwaza yibukije abantu ko igihe cyo kwibuka ivuka rya Yesu cyegereje anasaba abantu kwirinda ibikorwa bibi mu bihe by’iminsi mikurur ya Noheli.

TANGA IGITEKEREZO KURI IYI NKURU