Ijambo ryifashishwa mu gusobanura ibintu bikoreshwa inshuro imwe gusa bigahita bijugunywa, single-use, ryatowe nk’ijambo ry’umwaka wa 2018 n’ikigo gitegura inkoranyamagambo y’icyongereza ya Collins.

Ijambo ’Single-use’ ryatowe nk’ijambo ry’umwaka wa 2018
Amacupa akoreshwa rimwe risa amaze gutera inkeke ku bidukikije

Single-use ni ijambo ryatoranyijwe mu gihe Isi ihanganye n’ihindagurika ry’ibihe n’impamvu zituma rifata indi ntera, zirimo ikoreshwa ry’amashashi ya pulasitiki agenda akirunda ahantu ntabore, agahagarika imibereho y’ibinyabuzima.


Mu kurwanya izo pulasitiki, izahereweho ni amacupa y’amazi, imiheha, amashashi apfunyikwamo n’ibindi ukoresha rimwe ugahita ubijugunya, nyamara bigafata imyaka myinshi ngo bibore.

Si igikorwa kireba amahanga gusa kuko muri Nzeri, Minisiteri y’Ibidukikije yatangaje ko yamaze gushyikiriza guverinoma umushinga w’itegeko rihagarika ikoreshwa ry’amacupa n’ibindi bikoresho bya palasitiki bikoreshwa rimwe gusa.

U Rwanda rutoye iryo tegeko, rwaba igihugu cya kabiri muri Afurika kirifite nyuma ya Seychelles yaritoye muri Kamena 2018. Icyo gihugu cyasabye ko ibikoresho bya palatisitiki byaba byashize mu bubiko muri Mutarama 2019.

Mu Rwanda hari ubukangurambaga bwo gukumira amacupa y’amazi akoreshwa rimwe gusa, ngo hifashishwe ibicupa binini amazi ashiramo hakongerwamo andi, n’uyakeneye akifashisha ikirahuri abasha koza, kikongera gukoreshwa.

Mu itangazo Collins yashyize ahagaragara yagize iti “Amafoto y’ibintu bya pulasitiki binyanyagiye hirya no hino mu nyanja nk’imiheha, amacupa n’amashashi, byatumye hatangizwa ubukangurambaga hagamijwe kugabanya uburyo bikoreshwa.”

“Ikoreshwa ry’iri jambo [single-use] ryikubye inshuro enye uhereye mu 2013.”


Kuva ijambo ry’umwaka ryatangira gutoranywa, hemejwe amagambo atandukanye nka geek (2013), photobomb (2014), binge-watch (2015), Brexit (2016) na fake news (2017).

Ijambo ’Single-use’ ryatowe nk’ijambo ry’umwaka wa 2018
Ibihugu byafashe iya mbere mu guca ikoreshwa ry’amacupa n’imiheha byifashishwa inshuro imwe gusa

Andi yafashwe nk’amagambo yakoreshejwe cyane muri uyu mwaka ni #MeToo mu kwamagana abakora ihohotera rishingiye ku gitsina na “VAR”, impine y’imisifurire yifashisha isesengura ry’amashusho mu imikino y’umupira w’amaguru.

Leave a Reply