Imwe mu myitwarire ishobora gutuma ukomeza kwibera ingaragu

0
381

Benshi mu basore b’iki gihe batinya gushaka bagahitamo gukomeza kwibera ingaragu kubera impamvu zitandukanye. Bamwe bavuga ko babiterwa n’uko nta bushobozi bwo gutunga ingo ndetse n’ayo gukoresha mu birori by’ubukwe mu gihe abandi bavuga ko igihe kitaragera.

Imwe mu myitwarire ishobora gutuma ukomeza kwibera ingaragu

Ku ruhande rumwe ibi ni ukuri kuko umubare munini w’abasore usanga nta bushobozi bwinshi babona bwatuma bashinga ingo. Ubutaka nabwo bwabaye buke kandi nibwo bakagombye guhinga bakabona ubushobozi.


Icyakora ku rundi ruhande hari abasore baba bafite byose bageze no mu kigero cyo gushaka ariko ukibaza impamvu bakishimiye kuba ingaragu bikakuyobera.

Uyu munsi tugiye kurebera hamwe ibitera abasore kudashaka kandi bafite byose ntacyo babuze:

Bagira ubwoba bw’ibigaragarira amaso yabo

Ubundi abantu bagirira ubwoba ibibera mu miryango y’abandi birangira badashatse mu gihe cyose badakoze ibishoboka byose ngo barwanye ubwoba.

Iyo ubu bwoba bubaye nk’indwara ku bantu bageze mu gihe cyo gushaka kubera ibibazo byo mu miryango babona, birakura bigatuma ahora agira ubwoba bwo gufata icyemezo cyo gushinga urugo ndetse no kugira inshingano z’umuryango.

Gusa icyo abasore bageze muri iki kigero bakwiriye gukora ngo ni ukurwanya izo ntege nke zibatera kugira ubwoba kuko abakobwa bakunda abagabo bigirira icyizere kandi bafite ibitekerezo bikomeye.

Gutinyishwa n’ibyo ubona mu zindi ngo bishobora gutuma utinga gushinga urugo

Ubunebwe bwo gushaka abo bazabana

Aba bantu bafite ubushobozi ariko batagira igitekerezo cyo gushaka abo bazabana ngo usanga bagira ubunebwe cyangwa se kutibwiriza icyo bagomba gukora ngo bagere ku byishimo n’umunezero by’abashakanye.

Ahubwo ngo buri gihe umutima wabo bawuhoza ku bizatuma bafatwa nk’intwari muri rubanda. Ngo uko gutekereza ko igikorwa cyo gushaka kizaza hanyuma y’ibindi, bituma amahirwe yabyo arushaho kuyoyoka kuko muri ubu buzima nta kintu kibaho ku munsi wa nyuma ahubwo ibintu byose birategurwa hanyuma bigashyirwa mu bikorwa.Abasore bagirwa inama yo kwikuramo ubunebwe butuma batajya kurambagiza bakaguma kwibera ingaragu.

Barangwa no kunenga abandi

Urwego rw’imyumvire y’abantu ku bijyanye no gushyingiranwa n’imico by’abantu rwarazamutse. Rimwe na rimwe usanga amahame bagenderaho atuma badafata icyemezo gikwiye ahubwo bagahugira mu gushaka amakosa n’intege nke kuri bagenzi babo bigatuma batabona inyungu zizazanwa no kubana na bo.

Gusa ngo abafite imyumvire nk’iyi bakwiriye kumenya ko ubuzima bwiza, ibyishimo by’abashakanye bidashingira ku mbaraga z’umuntu ahubwo bishingira ku bwubahane n’ubwumvikane.

Ikindi kandi kireba abakobwa ngo ni uko badakwiriye kunenga abo bakundana na bo kubera ko binjiza umushahara muke kuko bituma abo basore bitakariza icyizere cyo gushaka burundu keretse babonye ahagije.

Ubuzima bwabo babwegurira imirimo ibazanira inyungu

Guhaguruka ugakura amaboko mu mufuka ntabwo ari umuco w’abanyarwanda gusa ahubwo biri mu ngamba zafashwe mu bihugu byo kumigabane itandukanye kugira ngo abantu biteze imbere barwanye ubukene.

Gusa hari ikosa bamwe bajya bakora iyo bashyira mu bikorwa iri hame cyane cyane igihe bakoze bakibagirwa ko bagomba no kuruhuka, gusangira n’inshuti no kwishimana nazo ndetse no kugira umuryango.

Abantu bateye gutya iyo bakomeje muri uwo murongo usanga bibakomerera kubaka no gusigasira umushyikirano bagirana n’inshuti zabo kubera ko amasaha 24 agize umunsi baba batekereza imishinga ibyara inyungu. Nta mwanya wo gukundana no kwishima bagira.

Abakunda akazi cyane baragirwa inama yo gukora ariko bakibuka ko hari izindi nshingano bakwiye kuzuza aho kuguma kwibera ingaragu.


Batekereza ko bazabona abahuje n’ibyifuzo byabo

Ibi ibintu bisanzwe aho usanga abakobwa bakiri ingaragu batekereza ko umunsi umwe bazabona abagabo bahuje n’uko imitima yabo ishaka.

Abasore na bo usanga bahorana inzozi zo kuzashaka umukobwa umeze uko babyifuza. Mese ugasanga bararyama bagakora urutonde rw’ibyo uwo bazabana agomba kuba yujuje. Ibi bituma bakomeza gutegereza ko bazabona uwo bifuza bikarangira basaziye aho.

Abameze batyo bagirwa inama yo kureka iyo myumvire ahubwo bakagira inzozi n’ibyifuzo bidatandukanye n’ukuri kw’ibishoboka. Gukomeza kurota ibintu bisa n’ibidashoboka bishobora gutuma utinda kubaka urug cg ukomeza kwibera ingaragu.

Muri make, imyumvire twabonye haruguru igomba kurekwa igasimbuzwa imitekerereze mishya kandi myiza kugira ngo ab’ingaragu badafite ubushake bwo kubaka kubera iriya myumvire twabonye bahindure ibitekerezo na bo bashinge ingo.

Leave a Reply