Guhera kuri uyu wa Kabiri, ku mbuga nkoranyambaga hacicikanye ifoto yatunguye benshi y’igitaramo cy’abahungu n’abakobwa bashaka kwimara ipfa ryo gukora imibonano mpuzabitsina, aho umuhungu yishyura akongezwa umukobwa wo gusambanya.

Kigali: Ifoto y’igitaramo cy'ubusambanyi kiri gutegurwa yatunguye benshi

Ibitaramo nk’ibi byakunze kumvikana hanze y’u Rwanda, hamwe bikamaganirwa kure ahandi hagashyirwaho ingamba zo kubikora mu buryo abato bakumirwa.

Mu Rwanda naho bamwe baguye mu kantu babonye inyandiko zamamaza igitaramo nk’iki bise Private Pussy Party”, kikaba kizaba ku wa Gatanu w’icyumweru gitaha.

Iki gitaramo cyateguwe mu ibanga rikomeye! Ku mbuga nkoranyambaga cyamamajwe mu buryo ntawe umenya aho kizabera, amafaranga yo kwinjira cyangwa ibindi bisobanuro bijyanye nacyo byinshi.

Ifoto icyamamaza yakangaranyije benshi kubera umukobwa uriho wicaye ahambiriye imigozi ku mabere n’igice cyo hasi, yambaye n’inkweto ndende.

Andi makuru dukesha IGIHE nuko umukobwa witwa Teta baganiriye (yirinze gutangaza irindi zina rye) uri mu bari kugitegura, yavuze ko kwinjira bizaba ari 30 000 Frw mu myanya isanzwe na 50 000 Frw mu myanya y’icyubahiro.

Biragoye ko yagira n’icyo agutangariza yeruye, kuganira nawe byasabaga kwigira nk’ushaka amakuru ngo azitabire icyo gikorwa.

Ati: “Kugura amatike biratangira uyu munsi […] ushaka itike wampamagara tukavugana. Uzajya umenya aho kizabera wishyuye kuko ni ibirori byihariye. Ibizakorerwamo byo ni byinshi uzishima birenze mu buryo bwose bushoboka.”

Yakomeje avuga ko umuntu uzitabira azanywa akarya ndetse uzaba yishyuye 50 000 Frw agahabwa n’umukobwa uzamushimisha mu buryo burenze.

Ati “Uzanywa, urye, ubyinirwe ndetse nuba wishyuye mu myanya y’icyubahiro uzaba ufite umukobwa wawe muzasambana. Abakobwa turabifitiye ariko unamufite wamusohokana.”

Yavuze ko abantu batazagura amatike mbere bazabihomberamo kuko hari imyanya bateganyije ibaze. Kubona itike babigize ubwiru, kuko bisaba guhura n’uyu mukobwa ukamwishyura murebana.

Mu kiganiro na IGIHE Dr Nzabonimpa Jaques ushinzwe Umuco muri RALC, yavuze ko ibintu nk’ibi we ntacyo yabivugaho, kuko yumva birenze guhonyora umuco, ahubwo bigomba gukurikiranwa na Polisi kuko biri mu cyiciro cy’ibyaha by’urukozasoni.

Minisitiri wa Siporo n’Umuco, Espérance Nyirasafari, we yabwiye IGIHE ko nta kintu yavuga ku gitaramo nk’iki kuko nta byinshi akiziho.

Leave a Reply