Kayibanda Mutesi Aurore wabaye Nyampinga w’u Rwanda mu 2012 yasabiye amajwi Iradukunda Liliane uriho ku Banyarwanda mu irushanwa rya Miss World riri kubera mu Mujyi wa Sanya mu Bushinwa.

Yabaye Nyampinga w’u Rwanda mu 2012 anagirwa Nyampinga w’Umurage, yanambitswe ikamba rya Miss FESPAM ryatangiwe mu Mujyi wa Brazzaville mu iserukiramuco rya Festival Panafricain de la Musique mu 2013.

Mutesi uba muri Leta Zunze Ubumwe za Amerika muri iki gihe abinyujije kuri Instagram yasabye abamukurikira n’abandi Banyarwanda gushyigikira Iradukunda Liliane uhatanye muri Miss World byiyongera ku ishyaka yari yamuteye ubwo yerekezaga mu mahanga guserukira Igihugu.

Yagize ati “Muraho bantu banjye! Reka dukomeze gushyigikira uw’igikundiro wacu Miss Iradukunda Liliane uhatanye muri Miss World. Ni ugushyira porogaramu ‘mobstar’ muri telephone yawe, ukiyandikisha hanyuma ugakomeza gukunda amafoto ye ari nako umutora.”

Ntabwo ari ku nshuro ya mbere Kayibanda Mutesi Aurore agaragaje gushyigikira Miss Iradukunda kuko ubwo yerekezaga mu Bushinwa nabwo yari yashyize kuri urwo rubuga ifoto ye akongeraho ati “Genda userukane ishema n’isheja mwana muto. Urashyigikiwe mu nguni zose.”

Mutesi Aurore usigaye uba muri Leta Zunze Ubumwe za Amerika hashize amezi ane afashe urundi rugendo rushya rw’ubuzima yiyemeza kurushinga n’umukunzi we w’igihe kirekire Mbabazi Egide.

Aba bombi bahanye isezerano imbere y’amategeko ku wa 29 Nyakanga 2018 ku nkombe z’inyanja mu Mujyi wa Portland wo muri Leta ya Maine, bemeranya kubana ubudahemukirana haba mu byiza no mu makuba.

TANGA IGITEKEREZO KURI IYI NKURU