Muhire Kevin, umukinnyi wo hagati wa Rayon Sports, agiye kwerekeza mu igeragezwa mu Misiri muri Misr lel-Makkasa Sporting Club, ikipe iri ku mwanya wa kane muri shampiyona ya Misiri.

Muhire Kevin agiye kwerekeza mu ikipe yo mu Misiri

Ubuyobozi bw’ikipe ya Rayon Sports bwamaze kwemerera uyu mukinnyi kwerekeza muri iyi kipe, aho yashimwe kubera uko yitwaye mu matsinda na ¼ cya CAF Confederations Cup 2018 by’umwihariko ku mikino ya USM Alger, Gor Mahia FC na Enyimba FC.


Misr lel-Makkasa Sporting Club itozwa n’Umunya-Misiri Talaat Youssef, yifuje Muhire kuva mu Ukwakira ariko ntiyemererwa kwerekeza muri iyi kipe nkuko IGIHE yabitangarijwe na Visi Perezida wa Rayon Sports, Muhirwa Freddy.

Visi Perezida wa Rayon Sports, Muhirwa Freddy yagize ati: “Twavuganye n’ikipe yo mu Misiri yifuza Kevin n’umukinnyi yavuganye nayo kandi arabishaka. Twamwemereye kujyayo kuko bifuza kumugerageza ibyumweru bibiri. Ibijyanye n’amafaranga bazaduha nibamushima twamaze kuyumvikanaho kandi twizeye ko bizagenda neza.”

Tariki 22 Ugushyingo 2018 nibwo Muhire Kevin asabwa kuba yageze mu Mujyi wa Cairo agatangira imyitozo n’igeragezwa rizasozwa tariki 6 Ukuboza 2018.

Ubuyobozi bw’iyi kipe Misr lel-Makkasa Sporting Club buramutse bushimye uyu umukinnyi mu nyuma y’igeragezwa, bukazishyura Rayon Sports yari afitiye amasezerano y’umwaka umwe ibihumbi 45 by’amadolari.

Ibaruwa ya Misr lel-Makkasa isaba Muhire Kevin
Ibaruwa ya Misr lel-Makkasa isaba Muhire Kevin

Misr lel-Makkasa Sporting Club iri ku mwanya wa kane muri shampiyona y’icyiciro cya mbere mu Misiri igeze ku munsi 14, aho ifite amanota 20 irushwa na Zamalek SC iyoboye urutonde amanota atandatu.

Ni ikipe yakinnye CAF Champions League uyu mwaka, aho yakirira imikino yayo kuri ‘Al-Fayoum Stadium’ yakira abantu ibihumbi 20.

TANGA IGITEKEREZO KURI IYI NKURU