Mu gihugu cya Nigeria, umugabo w’ imyaka 24 akomeje gutangaza abatari bacye kubera gufata moto ye akayihindura, akayiha ishusho imeze nk’ urukweto rw’abagore.

Umugabo wakoze moto imeze nk'urukweto rw'abagore akomeje gutangaza abatari bacye

Danladi Ibrahim utuye ahitwa Kaduna muri Nigeria, ni umugabo uzwi cyane muri aka gace ka Kaduna kubera ubuhanga afite mu gukanika amagare n’ amamoto.

Yatangiye gukora moto n’ amagare afite imyaka 7 kuko aribyo se yakoraga. Yavuye mu ishuri ageze mu mashuri yisumbuye kugira ngo age kwikomereza umwuga yarazwe na se w’ubukanishi.

Danladi Ibrahim avuga ko afata icyemezo cyo kuva mu ishuri, abantu bamugaye cyane ariko we arabikomeza kuko yumvaga aribyo umutima umuhata.


muri ako kaze ke, uyu mugabo yaje gukora moto ifite amapine atatu, hejuru asudiraho ibyuma ku buryo bikora ishusho y’ urukweto rw’ abagore nk’ uko bigaragara mu ifoto.

Danladi Ibrahim yabwiye itangazamakuru ryo muri Nigeria ko igihe kimwe yari mu muhanda atwaye iyi moto abapolisi baramuhagarika agira ngo bagiye kumuhana, ariko yatangajwe no kubona abo bapolisi basohotse mu modoka yabo bifatira amafoto y’ iyo moto maze bikomereza urugendo. Ati “Byarantunguye cyane.”

Uyu mugabo avuga ko mu myaka 3 amaze atwara iyi moto atarakora impanuka narimwe habe n’ iyoroheje.

Leave a Reply