Umuhanzi ukomeye muri iki gihe Yvan Buravan w’imyaka 22, yahigitse abahanzi bakomeye muri Afurika mu irushanwa ry’umuziki ya ‘Prix Decouverte 2018’, ritegurwa na Radiyo Mpuzamahanga y’Abafaransa (RFI).

Yvan Buravan aciye agahigo ko kuba ariwe munyarwanda wa mbere wegukanye Prix Decouverte itangwa na RFI

Yvan Buravan, azwi cyane nk’umwanditsi w’indirimbo akaba n’umuririmbyi ukora injyana ya RnB akavangamo na Pop. Ni umwe mu bahanzi barangamiwe cyane mu gihugu, ubuhanga bwe n’uburyo agorora ijwi biri mu byatumye akundwakazwa.

Yatowe n’akanama nkemurampaka kagizwe n’abahanga mu muziki ku rwego mpuzamahanga ku gicamunsi cyo kuri uyu wa Kane tariki ya 8 Ukwakira 2018.

iki gihembo gishobora kuzamufasha kuzamura urwego rwe rw’umuziki. Bikimara gutangazwa ko ari we utsinze, abatangaje iki gihembo bavugishije Buravan kuri telephone, nawe yishimira cyane intsinzi ndetse yongeraho ko uyu munsi atari businzire, ari burare yishimira iki gihembo. Nyuma yo gusoza ibijyanye no gutangaza uwatwaye igihembo byacaga imbona nkubone (live) ku rubuga rwa Facebook Prix Decouvertes RFI 2018 hahise hakinwa indirimbo ya Yvan Buravan ‘Garagaza’.

Iri rushanwa rimaze gutsindirwa n’abahanzi bakomeye muri Afurika mu myaka rimaze kuba, ryatwawe na Tiken Jah Fakoly (Côte d’Ivoire),Rokia Traoré (Mali), Didier Awadi (Sénégal), Amadou na Mariam (Mali), Maurice Kirya (Uganda) na Soul Bang’s (Guinée).

Yvan Buravan aciye agahigo ko kuba ariwe munyarwanda wa mbere wegukanye Prix Decouverte itangwa na RFI

Ubu hiyongereyeho Buravan wo mu Rwanda. Ni we wa mbere ukoze aya mateka ukomoka mu Rwanda mu myaka irushanwa rimaze riba.

Mu mwaka wa 2013 Mani Martin wo mu Rwanda yararyitabiriye ariko ntiyabasha gutsinda. Mu 2016 nabwo u Rwanda rwaserukiwe na The Ben n’umuraperi Angel Mutoni ariko ntibabasha gutsinda.

Leave a Reply