Abanyabirori ntibakunze gutangwa no kuryoherwa n’umuziki wavanzwe na DJ Marnaud uri mu gisekuru gishya cyazanye impinduka nyinshi mu ruganda rw’imyidagaduro mu Rwanda.

Amwe mu mateka y'umuvangamuziki Marnaud ukunzwe na benshi mu Rwanda

Ubusanzwe yitwa Mugisha Gatera Arnaud abarizwa mu itsinda ryishyize hamwe ry’abavanga imiziki rya Dream Team DJs ahuriyemo na DJ Toxxyk, DJ Miller, DJ Marnaud na DJ Jullz.

Iri tsinda ryashinzwe mu 2013 na DJ Miller nawe uri mu mashami yashibutse kuri Karim wagiye atoza aba basore batandukanye bahuriye muri Dream Tema DJs.


DJ Marnaud ni umusore w’imyaka 23 ariko umurebye utabizi ushobora kumwibeshyaho ukagira ngo arayirengeje.

Yigaragaje mu bitaramo bikomeye bitandukanye byabereye mu Rwanda birimo icyo Mr. Eazi yakoreye i Kigali, icya Meddy cyabereye i Nyamata mu 2017, Shyuha Festival, mu bitaramo bya ROC NYE, icya Tekno n’ibindi.

Yanaciye mu tubyiniro dutandukanye i Kigali turimo Cocobean, Voltage Night Club [yahoze ari K Club] n’ahandi henshi yishimirwa na benshi mu baba bahasohokeye.

Aherutse gutumirwa no mu gitaramo cya Wizkid kizabera muri Nigeria ku wa 16 Ukuboza 2018.

We na DJ Miller bari mu bazavanga imiziki mu gitaramo Meddy azakorera mu Burundi mu mpera z’uyu mwaka ndetse n’igifungura 2019 cya East African Party uyu musore ni we uzasusurutsa abazitabira.

Iyo muganira akubwira ko afite umwihariko wo kuvanga imiziki abihuza no gushyushya abafana.

Mu mashuri yize ibijyanye n’imibare, ubumenyamuntu n’ubugenge muri IFAK ku Kimihurura.

Amaze imyaka isaga itatu atangiye gukora umwuga w’ubu-DJ ariko ubu ni ikimenyabose!

Uretse kuvanga imiziki aherutse no kwamamara mu ndirimbo ze bwite zirimo ‘Bape’ yahuriyemo na Active ndetse na ‘Ribuyu’ yafatanyije na DJ Pius.

Mbere yo kuba umu-DJ, yari umubyinnyi mu ndirimbo zitandukanye dore ko yagaragaye mu mashusho ya ‘Ndumiwe’ ya Bruce Melody, ‘Kubita’ ya Urban Boyz ndetse n’izindi nyinshi zirimo n’iza Christopher.

Yabwiye IGIHE ko uyu mwuga wo kubyina atigeze awureka gusa kubera akazi kenshi ko kuvanga imiziki atabona umwanya wo kubikora mu buryo nk’ubwo yabikoragamo mbere.

Ati “Ntabwo ari uko naretse kubyina ngo mpite njya mu byo kuvanga imiziki, narabyinaga nyuma numva nshaka gukora ikindi kintu kitari byo, nibwo nahise ntangira gukora ubu-DJ mbona ndabishoboye ndabikomeza.”

“No kubyina nabikora ariko kubera impamvu z’uko kuvanga imiziki bintwara umwanya munini niyo mpamvu ntakibikora cyane ariko mu ndirimbo zanjye zigiye kujya ziza bazagenda babibona.”

Uko yatangiye ibyo kuvanga imiziki

Dj Marnaud avuga ko yakundaga umuziki kuva kera ari nabyo byamukururiye kuba yatangira kubyimenyereza.

Ati “Nakundaga umuziki kuva kera hari ukuntu byanjemo birahurirana mbona ndabishoboye. Negereye uwitwa DJ Karim aramfasha ntangira kubikora nza kubona ari impano nari nifitemo kuva kera.”

Mu ijoro rimwe ashobora gukorera arenga 1 000 000 Frw

DJ Marnaud avuga ko kuba avanga imiziki bimaze kumugeza ku rundi rwego ndetse ubu amaze kugira ibikorwa bitandukanye.

Ati “Kuba umu-DJ bimaze kungeza kuri byinshi maze kwigurira imodoka ya Benz, mfite akabari ndetse hari n’inzu ndi kubaka ariko ntabwo iruzura neza.”

Yakomeje agira ati “Mu gitaramo iyo nakoreye amafaranga make nibura aba ari 500 000 Frw ariko hari n’igishobora kurenza 1 000 000 Frw biterwa n’uko igitaramo kimeze. Ariko nka kiriya cya Wizkid cyo bampaye $10 000 ndetse n’ibindi nkorera hanze byo biba bihenze.”

Impamvu we n’itsinda rye bashinze akabari akaba ariwe bakitirira

Abakunze gusohoka bazi cyane akabari karimo n’akabyiniro kahoze kitwa Ogopogo ubu kahindutse DJ Marnaud Bar.

Aka kabari ni ak’itsinda uyu musore abarizwamo rya Dream Team DJs ariko babonye ashabutse kubarusha bahitamo kukamwitirira.

Ati “Impamvu akabari kanyitiriwe bagenzi banjye babonye arinjye ushabutse cyane nirukanka mu bintu cyane baravuga bati Marnaud we arabishoboye reka tumuharire abe ariwe ukurikirana aka kabari.”

IREBERE VIDEO NHYA YA EESAM YISE WOWE GUSA:

TANGA IGITEKEREZO KURI IYI NKURU