Maj Ntuyahaga Bernard wahamijwe uruhare mu rupfu rw’abasirikare 10 b’Ababiligi barindaga Minisitiri w’Intebe, Uwiringiyimana Agathe, yagejejwe mu Rwanda ku mugoroba wo kuri uyu wa 21 Ukuboza 2018.

Maj Ntuyahaga Bernard wahamijwe uruhare mu rupfu rw’abasirikare 10 b’Ababiligi yagejejwe mu Rwanda

Maj Ntuyahaga Bernard yakiriwe nk’Umunyarwanda wahamijwe ibyaha ariko akarangiza ibihano bye. Yageze ku Kibuga Mpuzamahanga cy’Indege cya Kigali i Kanombe ari kumwe n’abantu bavanye mu Bubiligi.

Umuyobozi wa Komisiyo yo gusezerera no gusubiza mu buzima busanzwe abari abasirikare, Mukantabana Séraphine, yatangarije IGIHE ko Maj Ntuyahaga yageze mu gihugu cye nk’uwahoze ari umusirikare.


Yagize ati: “Yaje nk’uwahoze ari umusirikare, icyo azakora namara kuruhuka ni ukujya i Mutobo, agafashwa gusubira mu buzima busanzwe mu gihe cy’amezi atatu. Twamwakiriye nk’uwahoze mu gisirikare.”

Maj Ntuyahaga Bernard yahamijwe urupfu rw’abasirikare b’Ababiligi biciwe mu Rwanda mu 1994, akatirwa n’inkiko zo mu Bubiligi gufungwa imyaka 20, akaba yagejejwe mu Rwanda nyuma y’amezi atandatu arangije icyo igifungo.

Ntuyahaga yashinjwe ko yavanye abasirikare 10 b’Ababiligi bari mu butumwa bw’amahoro bw’Umuryango w’Abibumbye mu Rwanda (MINUAR) mu 1994 kwa Uwiringiyimana bari bashinzwe kumurinda, abashyira mu maboko y’abasirikare bagenzi be muri “Camp Kigali” baza kwicwa.

Uyu mugabo w’imyaka 66 yakunze kugaragaza impungenge ku kuzanwa mu Rwanda, yitwaje ko ubwo yakatirwaga n’Urukiko rwa Bruxelles mu 2007, rwamukuriyeho kurindirwa umutekano nk’uko biteganywa n’amasezerano ya Genève yo mu 1951.

Muri Kamena 1998 nibwo Ntuyahaga yishyikirije Urukiko Mpuzamahanga Mpanabyaha Rwashyiriweho u Rwanda (ICTR) i Arusha, akurikiranyweho ibyaha bya Jenoside n’ibyibasiye inyokomuntu, ariko ku wa 18 Werurwe 1999 rutangaza ko rutakimukurikiranye.

Umunsi yarekuweho Tanzania yahise imuta muri yombi imushinja kwinjira ku butaka bwayo binyuranyije n’amategeko.

U Rwanda rwasabaga ko yoherezwa ngo rumuburanishe ku byaha yari akurikiranyweho, ariko muri Werurwe 2004, nyuma y’igihe aburanira kutarugarukamo, yafashe indege agana mu Bubiligi. Muri Mata 2007 atangira gukurikiranwa n’inkiko.

Urukiko rwo mu Bubiligi rwaje guhamya Maj Ntuyahaga Bernard icyaha cyo kwica abasirikare b’Ababiligi n’uruhare muri Jenoside yakorewe Abatutsi, maze ku wa 5 Nyakanga 2007 rumukatira igifungo cy’imyaka 20.

Maj Ntuyahaga Bernard yavukiye muri komine Mabanza mu yahoze ari Perefegitura ya Kibuye, mu 1952. Yinjiye mu Ngabo z’u Rwanda mu 1972, mu 1994 akaba yari afite ipeti rya Major, akora mu biro bikuru by’ingabo, mu ishami rishinzwe ibikoresho, (G4).

Mu gusubiza mu buzima busanzwe abahoze mu mitwe yitwaje intwaro biganjemo ababarizwaga muri FDLR, u Rwanda rumaze kwakira ababarirwa mu bihumbi 11 n’imiryango yabo.

Maj Ntuyahaga yaherekejwe n'Ababiligi bamugeza i Kigali
Maj Ntuyahaga Bernard yaherekejwe n’Ababiligi bamugeza i Kigali

IREBERE VIDEO NHYA YA EESAM YISE WOWE GUSA:

TANGA IGITEKEREZO KURI IYI NKURU