Umuririmbyi ukomeye mu Rwanda, Mani Martin agiye gushyikiriza ibihembo abanyempano babiri bahize abandi mu irushanwa yakoze ryo kubyina no kuririmba indirimbo yise ‘Ndaraye’.

Mani Martin agiye guhemba abahize abandi mu kuririmba no kubyina Ndaraye

Ndaraye, ni indirimbo ifite umudiho wa Kinyarwanda ikaba ikubiyemo ubutumwa bwumvikanisha uburyo umuntu ajya imahanga ariko bikarangira asubiye kuri gakondo ye kubera ibyiza byihariye aba yarahasize.

Yasohoye amashusho ya ‘Ndaraye’ mu mpera z’Ugushyingo 2018.

Mani Martin mbere y’uko asohora iyi ndirimbo mu buryo bw’amashusho yabanje gutegura irushanwa ryo kuyibyina mu buryo bwo kumenyekanisha imbyino z’Abanyarwanda yifashishije abakunda umuziki we.


Irushanwa ryitabiriwe n’abiganjemo abasanzwe bakunda umuziki we, by’umwihariko abiyumva mu ndirimbo zifite umudiho wa Kinyafurika.

Mu banyempano icumi bigaragaje cyane kurusha abandi, agiye gutoranyamo babiri ba mbere bagenerwe ibihembo mu gitaramo azakora kuri uyu wa Gatandatu tariki ya 8 Ukuboza 2018 muri Le Must Club mu Kiyovu.

Muri iki gitaramo azaririmbira abakunzi be mu gihe Dj Phil Peter na mugenzi we Lenzo bazavanga umuziki ndetse na bo bavuga ko biteguye iki gitaramo.

Umunyempano uzaba warahize abandi mu kuririmba, azahembwa gukorana indirimbo na Mani Martin mu gihe uwabyinnye ‘Ndaraye’ akishimirwa kurusha abandi azahabwa ishimwe rihwanye n’amafaranga ibihumbi 50 y’u Rwanda.

Mani Martin agiye guhemba abahize abandi mu kuririmba no kubyina Ndaraye

TANGA IGITEKEREZO KURI IYI NKURU