P.Diddy yagarutse ku buzima abayemo n’uko amerewe nyuma y’urupfu rwa Kim Porter wamusigiye abana bane agomba gukurikirana ubuzima bwabo bwa buri munsi.

Nyuma yo gupfusha umugore P.Diddy yagarutse ku buzima abayemo

Mu butumwa uyu mugabo yasakaje mu ntangiro z’iki cyumweru, yavuze ko yatangiye ubuzima bushya, abigaragaza arimo kuririmba mu modoka, ajyanye ku ishuri abana b’impanga yabyaranye na Kim Porter.

Ati: “Ubwo munyumva mvuga Mama cyangwa Papa, abagore bose badafite abagabo babyumva vuba ndetse n’abagabo bapfakaye bamwe na bamwe. Bagabo mukanguke mukore byose. Abagore babikora buri gihe.”

Arongera ati “Ndabikunda ariko hari ikintu kimwe kinshyira hasi, kubyuka mu cya kare birangora.”

Uyu mugabo ubwo Kim Porter yapfaga, TMZ yashyize hanze amajwi yavugiye ku kiriyo yumvikanishaga ishavu rye n’agahinda.

Icyo gihe yagiraga ati: “Yari inshuti yanjye ya mbere. Yari umunyamabanga wanjye. Yamfashaga muri byinshi akanyobora aho natannye kandi na n’ubu azakomeza kumba hafi.”

P. Diddy hari n’igihe yigeze kuvuga ko yumvaga ko ariwe Imana izajyana mbere ariko ntibibe. Avuga ko itagombaga kureka ngo bimere uko byabaye.

Ku wa 16 Ugushyingo 2018 nibwo hacicikanye inkuru z’urupfu rwa Kim Porter wahoze abana na P. Diddy, bakaza gutandukana nyuma y’imyaka 13 bafitanye abana batatu.

Nyuma yo gupfusha umugore P.Diddy yagarutse ku buzima abayemo
P Diddy na Kim Porter bari bafitanye abana batatu

Aba bombi bakundanye kuva mu 1994, urukundo rwabo ruza kugera ku iherezo mu 2007. Abana batatu babyaranye barimo impanga z’abakobwa zavutse mu 2006 Jessie James na D’Lila ndetse n’umuhungu witwa Christian wavutse mu 1998.

Kim Porter yari afite undi mwana witwa Quincy Brown yabyaranye n’umuhanzi Al B. Sure! bakundanye mbere ya P.Diddy. Kim Porter yapfuye afite imyaka 47.

TANGA IGITEKEREZO KURI IYI NKURU