Kuri iki Cyumweru tariki ya 13 Mutarama 2019, abakobwa 20 bakatishije itike yo kujya mu mwiherero wa Miss Rwanda basezeye ku babyeyi, abavandimwe n’inshuti zabo, berekeje i Nyamata aho bazamara ibyumweru bibiri.

Abakobwa 20 bakatishije itike yo kujya mu mwiherero basezeye ku babyeyi

Mu mwiherero ugiye kubera i Nyamata nk’uko bisanzwe, aba bakobwa bazamarayo icyumweru ariko mu cya kabiri hazajya hataha umukobwa umwe umunsi ku munsi nk’uko byatangajwe mu mpinduka nshya zinjijwe muri iri rushanwa.


Bazigishwa ibintu bitandukanye by’umwihariko ibizabafasha gutegura imishinga yabo neza no kuba babasha guhatana mu yandi marushanwa y’ubwiza ku rwego mpuzamahanga.

Impinduka zashyizwe muri iri rushanwa zizatuma mu bakobwa 20 bagiye mu mwiherero hasigaramo 15 bazagera ku munsi wa nyuma bagatorwamo Nyampinga w’u Rwanda uzambara ikamba rya 2019.

Kuri iki cyumweru tariki 13/01/2019 nibwo mu nzu y’inama ya Ministeri y’Umuco na Siporo habereye ikiganiro cyasobanuriwemo ibijyanye n’uyu mwiherero w’abakobwa 20 bari guhatanira ikamba rya Nyampinga w’u Rwanda ndetse hasobanurwa uko gutora binyuze mu butumwa bugufi (SMS) bizagenda.

Abakobwa bazabasha kugera ku munsi wa nyuma ya Miss Rwanda 2019 ni 15, tariki 24 Mutarama 2019 hazaba umusangiro (Gala Dinner) uzahuza abakobwa bose bari mu irushanwa ndetse hatangarizwe:

  • Umukobwa wabanye neza n’abandi mu mwiherero (Miss Congeniality);
  • Umukobwa waranzwe n’umuco (Miss Heritage)

Umukobwa ukunzwe kurusha abandi (Miss Popularity) we azatangazwa ku munsi wa nyuma w’irushanwa, n’uburyo azaba ashyigikiwe kuri uwo munsi biri mu bizamuhesha amanota.

Gutora binyuze ku butumwa bugufi bizatangira ku itariki ya 20 Mutarama 2019, amasaha yo gutoreraho ni buri munsi ni kuva saa kumi n’ebyiri za mu gitondo kugeza saa tatu z’ijoro.

Nyampinga w’u Rwanda azamenyekana mu birori bikomeye bizaba ku wa 26 Mutarama 2019 habe Grand Finale muri Intare Conference Arena i Rusororo.

Umukobwa uzatorerwa kuba Nyampinga w’u Rwanda 2019 azahabwa amasezerano yo kuba Brand Ambassador wa Cogebanque itera inkunga iri rushanwa ndetse ajye ahembwa umushahara wa 800,000 Frw n’imodoka nshyashya.

Umukobwa uzatorerwa kuba igisonga cya mbere azagenerwa igihembo cya miliyoni imwe y’amafaranga y’u Rwanda (1,000,000 Frw) naho igisonga uzaba igisonga cya kabiri ahembwe ibihumbi magana atanu by’amafaranga y’u Rwanda (500,000 Frw).

IREBERE VIDEO NHYA YA EESAM YISE WOWE GUSA:

Amafoto: FOCUSiCON

TANGA IGITEKEREZO KURI IYI NKURU