Ikipe y’igihugu y’u Rwanda y’umupira w’amaguru, Amavubi, igiye gutangira urugamba rwo gushaka itike y’igikombe cya Afurika gihuza abakina imbere mu bihugu byabo, CHAN 2020, aho yatomboye guhera ku ikipe y’igihugu ya Somalia.

Amavubi yatomboye Somalia mu gushaka itike ya CHAN 2020

Kuri uyu wa Gatatu tariki 30 Mutarama 2019 nibwo komisiyo ishinzwe amarushanwa mu mpuzamashyirahamwe y’umupira w’amaguru muri Afurika, CAN, yatangaje uko ibihugu bizahura ku mugabane wose wa Afurika bashaka iyi tike.


Iki gikombe cya Afurika kigiye kuba ku nshuro ya gatandatu kizaba hagati ya Mutarama na Gashyantare 2020 kibere kuri stade enye zo muri Ethiopia, Bahir Dar Stadium yakira abantu ibihumbi 60, Tigray Stadium yakira abantu ibihumbi 40, Addis Ababa Stadium yakira abantu ibihumbi 35 na Abebe Bikila Stadium yakira abantu ibihumbi 30.

U Rwanda rwatomboye gutangira ruhangana na Somalia, rwayisezerera rukazahangana n’ikipe izakomeza hagati ya Uganda na Sudani y’amajyepfo, ariko amatariki iyo mikino izaberaho yo ntabwo CAF irayatangaza.

Ikipe y’Igihugu Amavubi iheruka guhura na Somalia muri CECAFA ya 2009 yabereye muri Kenya aho u Rwanda rwatahanye intsinzi y’ibitego 3-0.

Iki gihugu cyo mu ihembe rya Afurika cyo giheruka mu Rwanda mu mikino yo gushaka itike y’imikino Olempike 2016 yabereye muri Brésil, aho Amavubi yasezereye Somalia U23 ku giteranyo cy’ibitego 2-0.

Uko amakipe yo mu karere ka Afurika y’i Burasirazuba azahura

• Rwanda vs Somalia
• Tanzania vs Sudani
• Kenya vs Burundi
• Uganda vs Sudani y’amajyepfo

Amavubi agiye gutangira gushaka itike ya CHAN 2020 izabera muri Ethiopia
Amavubi agiye gutangira gushaka itike ya CHAN 2020 izabera muri Ethiopia
Ubwo Somalia iheruka gukinira mu Rwanda yatsinzwe 2-0
Ubwo Somalia iheruka gukinira mu Rwanda yatsinzwe 2-0

IYUMVIRE UBURYO BUTANGAJE BAMWE BASUBIZAMO IBIBAZO BY’UBUSA BUSA-Ntiwibagirwe GUKORA SUBSCRIBE:

TANGA IGITEKEREZO KURI IYI NKURU