Igisirikare muri Gabon cyahiritse ku butegetsi Perezida Ali Bongo umaze igihe arwariye muri Maroc, akaba yari akiriyo mu atarakira neza.

Gabon: Perezida Ali Bongo yahiritswe ku butegetsi n'igisirikare

Itangazo ingabo zanyujije kuri Radiyo y’igihugu zavuze ko zigiye gushyiraho Inama ishinzwe kugarura igihugu ku murongo.

Bavuze ko bababajwe n’ijambo Perezida Bongo yagejeje ku baturage tariki 31 Ukuboza 2018 nk’uko RFI dukesha iyi nkuru yabitangaje.


Ni ku nshuro ya mbere ijwi rya Bongo ryari ryongeye kumvikana nyuma yo kujyanwa mu bitaro by’i Riyadh muri Arabie Saoudite, tariki 24 Ukwakira 2018 ubwo yagiraga ikibazo cyo guturika k’udutsi two mu bwonko.

Muri iryo jambo Perezida Ali Bongo yavuze ko amezi abiri ashize yanyuze mu bihe bigoye nkuko bisanzwe mu buzima ariko ashimangira ko atangiye kumererwa neza kandi azagaruka ku buyobozi vuba.

Guhera mu mpera za Ugushyingo, Bongo ari muri Maroc hanze y’ibitaro aho akurikiranwa ngo atore agatege.

Abatavuga rumwe na Leta hamwe na Sosiyete Sivile bari bamaze igihe basaba Urukiko rurinda Itegeko Nshinga gutangaza ko Perezida atagishoboye kuyobora kugira ngo asimbuzwe.

Icyakora, urukiko si ko rwabigenje ahubwo ububasha bwa Perezida rwabuhaye by’agateganyo Minisitiri w’Intebe n’umwungirije.

Perezida Ali Bongo w’imyaka 59 yagiye ku butegetsi mu 2009 nyuma y’urupfu rwa se Omar Bongo, akaba ahiritswe mu gihe hari hashize iminsi mike Leta Zunze Ubumwe za Amerika zohereje abasirikare 80 muri icyo gihugu, bivugwa ko bagamije gutabara muri Repubulika Iharanira Demokarasi ya Congo igihe haba havutse imvururu zijyanye n’amatora.

IREBERE VIDEO NHYA YA EESAM YISE WOWE GUSA:

IGITEKEREZO 1

TANGA IGITEKEREZO KURI IYI NKURU