Kuri uyu wa Kane 17 Mutarama 2017, Polisi yo muri Ghana yatangaje ko umunyamakuru Ahmed Hussein-Suale wacukumbuye ruswa n’amanyanga yakorerwaga mu mupira w’amaguru muri iki gihugu, yishwe arasiwe mu Mujyi wa Accra.

Ghana: Umunyamakuru Ahmed Hussein-Suale yishwe arashwe

Uyu munyamakuru Ahmed Hussein-Suale yari mu itsinda ryari riyobowe n’umunyamakuru Anas Aremeyaw Anas, rigakora ubucukumbuzi bwatumye abayobozi b’umupira w’amaguru muri Ghana begura, n’abasifuzi barahagarikwa kubera ruswa.


Umuvugizi wa Polisi yabwiye AFP ko Ahmed Hussein-Suale yarashwe ku ijosi no mu gatuza n’abantu bitwaje intwaro bataramenyekana ubwo yerekezaga iwe mu ijoro ryo kuri uyu wa Gatatu.

Mu kwemeza aya makuru, Anas, yanditse kuri Twitter ati: “Inkuru mbi ariko ntabwo tuzacecekeshwa. Ruhukira mu mahoro Ahmed”.

Abanyamakuru bo muri Ghana bamaganye iyicwa ry’uyu munyamakuru Ahmed Hussein-Suale w’imyaka 34, wagize uruhare rukomeye mu kugaragaza ruswa yari mu mupira w’amaguru yatumye mu Ukwakira umwaka ushize FIFA ihagarika burundu uwari umuyobozi w’ishyirahamwe ry’umupira w’amaguru muri Ghana, Kwesi Nyantakyi, ndetse acibwa $500,000 nyuma yo kugaragazwa ku mashusho yakira ruswa.

Abasifuzi umunani n’abo bafatanya bahagaritswe ubuzima bwabo bwose muri ruhago, abayobozi 53 bahagarikwa imyaka 10 mu gihe abayobozi 14 bagizwe abere.

IREBERE VIDEO NHYA YA EESAM YISE WOWE GUSA:

TANGA IGITEKEREZO KURI IYI NKURU