Nk’uburyo bwo kuziba icyuho idolari ry’ Amerika rimaze imyaka ryarigaruriye ubukungu bw’igihugu, Minisitiri w’Imari muri Zimbabwe, Mtuli Ncube, yatangaje ko igihugu cye kigiye kugarura idolari rya Zimbabwe ku isoko mu mpera z’umwaka wa 2019.

Idolari rya Zimbabwe rigiye kongera gushyirwa ku isoko

Idolari rya Zimbabwe ryakuwe ku isoko mu 2009, nyuma yo gutakaza agaciro ku kigero cya 231 000 000 %. Ubutegetsi bwa Robert Mugabe wayoboraga iki gihugu bwarisimbuje idolari rya Amerika n’andi mafaranga arimo n’irandi ryo muri Afurika y’Epfo.


Mu 2008, igi ryaguraga miliyari $50 akoreshwa muri Zimbabwe, ari na cyo giciro cy’umugati, aya yashoboraga kugura imodoka 12 mu 1998.

The Herald yanditse ko ibiganiro byo kugarura ku isoko idolari rya Zimbabwe byagarutsweho mu Ukwakira 2018. Byabayeho nyuma y’igabanuka ry’amadolari ryanagize ingaruka ku bukungu.

Minisitiri Mtuli Ncube w’imyaka 56 yavuze ko kugarura idolari rya Zimbabwe bizafasha Guverinoma guhangana n’amasoko anyuzwaho amafaranga binyuranye n’amategeko, yatumye ata agaciro (inflation).

Yagize ati: “Navuga ko hari intambwe yatewe ishingiye ku mbaraga zacu zo guhuza amafaranga yo hanze ahagije no gutangiza iryacu faranga. Ushobora kubara mu mezi ariko ntibizafata imyaka.’’

Mu 2016, Guverinoma ya Zimbabwe yagerageje gushyiraho irindi faranga yasimbuje idolari rya Amerika ariko agaciro karyo kahise kagwa bwangu.

Emmerson Mnangagwa wagiye ku butegetsi mu mpera za 2017, asimbuye Mugabe wari ubumazeho imyaka 37, ntarakemura iki kibazo.

Ibintu byakomeje kuzamba bitewe n’umusoro mushya washyizwe ku ihererekanya ry’amafaranga hifashishijwe ikoranabuhanga mu kuzamura amafaranga Leta ya Zimbabwe yinjiza, byatumye idolari ryongera kubura.

Idolari ryo muri Zimbabwe rigiye kongera gushyirwa ku isoko
Zimbabwe igiye kugarura idolari ryayo ku isoko bitarenze umwaka wa 2019

Mu byumweru bishize mu bitaro n’ibigo by’amashuri mu Mujyi wa Harare hadutse imyigaragambyo ishingiye ku ifaranga ryataye agaciro, ibura ry’ibikomoka kuri peteroli n’imiti.

IREBERE VIDEO NHYA YA EESAM YISE WOWE GUSA:

TANGA IGITEKEREZO KURI IYI NKURU