Umuhanzi wamamaye mu Njyana Nyafurika, Bagabo Adolphe uzwi nka Kamichi n’umugore we bimuye itariki y’ubukwe bwabo bitewe n’ibibazo by’ikirere.

Kamichi n’umugore we baherutse kubyarana bimuye itariki y’ubukwe bwabo

Kamichi ari ku rutonde rumaze kurambuka rw’abahanzi b’abanyarwanda bimuriye ingando ibwotamasimbi cyane muri Leta Zunze Ubumwe za Amerika, aho ariyo kuva muri Mata 2014, ubu akaba abarizwa muri Leta ya Tenessee mu Mujyi wa Knoxville.


Yagiye ari umwe mu bahanzi bakunzwe cyane mu Rwanda mu ndirimbo ze nk’iyitwa ‘Aho Ruzingiye’, ‘Ifirimbi ya Nyuma’, ‘Barandahiye’, Imitoma, n’izindi nyinshi. Ari mu bahataniye Primus Guma Guma Super ya gatatu.

Kuva yajya muri Amerika kugera mu 2018 ntiyongeye kuvugwa cyane mu itangazamakuru.

Inkuru eshatu zikomeye zavuzwe kuri Kamichi harimo gusezerana n’umukunzi, kwibaruka imfura no gushyira hanze indirimbo yise My Karabo, zageze mu matwi y’abakunzi be bari bamukumbuye byo gusara.

Mu kiganiro na IGIHE, yadutangarije yishimiye uburyo abakunzi be bamwakiriye nyuma y’igihe kinini bumva izo yabasigiye.

Ati “My Karabo nishimiye uko yakiriwe, ntabwo navuga ko byantunguye ariko sinahamya ko nari nzi uko izakirwa. Hari hashize igihe kinini ntakora, bivuze ko ntari nzi uko ibintu byifashe mu by‘ukuri. Ndashimira abakomeje kunyereka urukundo.”
Itariki y’ubukwe bwe yarimuwe

Kuri Kamichi, umwaka wa 2018 wari umwaka uw’ibikorwa bikomeye gusa. Muri Mata Nibwo yateye ivi yambika impeta umukunzi we ukomoka muri Zimbabwe, Ku wa 08 Kamena 2018 basezerana imbere y’amategeko, bidatinze tariki ya 18 Nzeri yibaruka imfura ye yise Karabo.

Nyuma yo gusezerana imbere y’amategeko, yabwiye IGIHE ko ibirori bitari byarangiye kuko yagombaga gusezerana imbere y’Imana tariki 14 Gashyantare 2019 ku munsi w’abakundanye (Valentine’s Day).

Kugeza ubu gahunda zamaze guhinduka, kuko ubukwe bwe yabushyize mu mpeshyi, bitewe n’uko muri Gashyantare hazaba hari ubukonje bwinshi bwabangamira imigendekere myiza yabwo, aho yagize ati: “Byarimuwe, yari itariki y’urukundo ariko hazaba hakonje cyane twabishyize mu mpeshyi.”

Abajijwe ku gihe ateganya kwerekana umugore we mu Rwanda no gutaramira abakunzi be, yirinze kugira icyo abitangazaho, avuga ko azabikora ‘igihe nikigera’.

Kamichi n'umugore we bibarutse umwana w'umukobwa nyuma y'igihe gito bakoze ubukwe
Kamichi n’umugore we bibarutse umwana w’umukobwa nyuma y’igihe gito bakoze ubukwe

Kamichi yemeza ko umugore bamaze igihe gito babana, amaze guhindura ibintu byinshi mu buzima bwe kandi mu buryo bwiza.

Kuri ubu Kamichi ari gukorera muzika mu nzu yitwa Mo Music ya Lick Lick wanamukoreye nyinshi mu ndirimbo ze mbere y’uko bose bajya muri Amerika.

Nyuma yo gushyira hanze ‘My karabo’ umwaka ushize, yatangaje ko agiye gushyira hanze indi ndirimbo mu gihe kitarenze ukwezi, kandi yizeye ko izaba irenze izindi yakoze.

Ati “Nta kwezi gusigaye, sindayihitamo muri nyinshi mfite muri studio. Gusa igomba kuba iruta izindi mfite. Byanshimisha ikomeje gukundwa no kurusha na My Karabo.”

Iyi ndirimbo n’izindi zizagenda zisohoka zizaba ziri kuri album ye ya kane yise ‘Intangiriro Igice Cya Kabiri’, izaba iriho indirimbo z’urukundo no kongera kugaruka mu muziki nyuma y’imyaka itanu.

Ati: “Album ndi kuyikoraho, yitwa Itangiriro igice cya kabiri. Ivuga ku rukundo nk’uko Bibiliya ivuga ko Imana yarushyize hagati y’umugore babanje ku Isi. Ivuga kandi ku gutangira umuziki kwanjye kwa kabiri nyuma y’imyaka itanu, ni ikintu kinini cyane.”

Iyi album izaba ije ikurikira iyitwa ‘Umugabirwa’ yamuritse mu 2011, ‘Ubumuntu’ yashyize hanze mu 2012 na ‘Mudakumirwa’ yamuritse mu 2013.

Gukorera umuziki mu mahanga Kamichi avuga ko birimo inyungu nyinshi kurusha imbogamizi kuko abasha gukora ibihangano bifite ireme cyane cyane amashusho ashobora kwerekanwa kuri televiziyo zikomeye.

Kamichi yatangaje ko azakora ubukwe mu mpeshyi y'uyu mwaka
Kamichi yatangaje ko azakora ubukwe mu mpeshyi y’uyu mwaka
Kamichi n'umugore we mu bwami bw'urukundo nyuma yo gushyingirwa imbere y'amategeko
Kamichi n’umugore we mu bwami bw’urukundo nyuma yo gushyingirwa imbere y’amategeko

IREBERE VIDEO NHYA YA EESAM YISE WOWE GUSA-Ntiwibagirwe GUKORA SUBSCRIBE:

TANGA IGITEKEREZO KURI IYI NKURU