Ni amashusho yatunguye bamwe kubera umukobwa ugaragaramo ari umukunzi wa King James, umukobwa ufite ubumuga bw’uruhu, aho King James yasobanuye impamvu yatumye amukoresha.

Menya impamvu yateye King James gukoresha umukobwa ufite ubumuga bw’uruhu mu mashusho y'indirimbo ye

Ku mugoroba wo ku wa Gatatu, abakunzi ba King James bari bamaze iminsi bategereje amashusho y’indirimbo ye yise ‘Igitekerezo’ yabamaze ipfa ayashyira hanze.


Iyi ndirimbo yakoze ku ndiba y’imitima ya benshi kubera injyana yayo n’amagambo ayigize, bigeze ku mashusho, yifatanya na Mukarusine Claudine, ari nawe Visi Perezida w’Umuryango w’Abafite Ubumuga bw’Uruhu mu Rwanda (OIPPA).

Abashishikajwe no guteza imbere abafite ubu bumuga bati ‘ushimye ahaturyaga’. Mu bamushimye harimo n’Umunyamabanga wa Leta muri Minisiteri y’Ububanyi n’Amahanga, Olivier Nduhungirehe wagize ati: “Uyu ni umusore wanjye King James! Amashusho yihariye ku ndirimbo yihariye.”

Mu kiganiro King James yagiranye na IGIHE ari nacyo dukesha iyi nkuru, yavuze ko igitekerezo cyo gukora iyi ndirimbo cyavuye ku yari yacuranzwe na Dj Zizou, bitewe n’injyana yayo amubwira ko bibaye byiza yayiririmbamo.

Ati: “Ni Zizou wampamagaye arambwira ati hano hari ‘beat’ numvise ari wowe wayikora, ndamanuka njya muri studio maze kuyumva hari ibintu tubanza gukora twita ibishinwa byo kuririmba ukaza kwandika nyuma, kugira ngo utaza kwibagirwa uburyo indirimbo iririmbyemo.”

Yakomeje avuga ko yatangiriye ku nyikirizo aho agira ati “byanjemo nkwiyumvamo, mpita niyemeza kugukunda [….]” ariko ari ibintu bidafite amagambo yuzuye, amaze gukora inyikirizo ibintu birahinduka baramubwira bati ‘iyi ndirimbo ni iyawe’.

King James avuga ko igitekerezo cyo gukoresha umukobwa ufite ubumuga bw’uruhu muri iriya ndirimbo ye yakigize biturutse ku mashusho yarebe kuri YouTube muri Mutarama umwaka ushize, y’uburyo abafite ubu bumuga bahohoterwaga bikomeye muri Tanzania.

Ati: “Ni ahongaho hahise hava igitekerezo cyo kuvuga ngo ese uwakoresha umukobwa ubana n’ubu bumuga, ariko noneho nkoze indirimbo nise ‘Igitekerezo’ numva niyumvise ko ariho hantu ashobora kujya ngatanga ubutumwa nk’uko nifuzaga kubutanga.”

Uyu muhanzi avuga ko yari agamije kwerekana ko abafite ubu bumuga bakwiriye guhabwa agaciro nk’abandi bantu batabufite.

Yakomeje ati: “Abantu benshi ntabwo babazi cyangwa se ngo babahe agaciro nk’ako baha aba bantu badafite ubu bumuga. Ikindi abakobwa bafite ubu bumuga baritinya cyane usibye n’ubu bw’uruhu n’abafite ubundi niko bameze.”

“Nashakaga kwerekana ko rero niyo waba ufite ubu bumuga ushobora kujya mu mashusho y’indirimbo ukajya mu marushanwa y’ubwiza n’ahandi hatandukanye kandi ukabigeraho.”

Guhura ntibyikoze

King James avuga ko kubona Mukarusine Claudine byabanje kumugora, ariko bamara kubonana umukobwa agahita yumva ubutumwa bwe.

Ati: “Twabanje kunyura ku mugabo usemura ururimi rw’amarenga kuri Televiziyo y’u Rwanda, aduha nimero z’uriya mukobwa Claudine nk’umuyobozi kugira ngo adufashe, amaze kuziduha ntibyaza gukunda ko duhita tumubona ariko bigeze nyuma dutangiye gucika intege ko tutazamubona aratubwira reka njye mbafashe.”

King James yavuze ko uyu umukobwa ufite ubumuga bw’uruhu bakoranye mu mashusho y’indirimbo atigeze amugora kuko yamusobanuriye undi agahita abyumva vuba, akamubwira ko ‘namaze kumva ubutumwa ushaka gutanga nta kintu byaba bintwaye nanjye ngufashije’.

Menya impamvu yateye King James gukoresha umukobwa ufite ubumuga bw’uruhu mu mashusho y'indirimbo ye
King James avuga ko kubona Mukarusine Claudine byabanje kumugora, ariko bamara kubonana umukobwa agahita yumva ubutumwa bwe

TANGA IGITEKEREZO KURI IYI NKURU