Abakurikiranira hafi imyidagaduro hano mu Rwanda muri rusange bakomeje kwibaza kuri Mwiseneza Josianne umaze kuba ikimenyabose hirya no hino ku mbuga nkoranyambaga n’ukuntu yaba yarahawe imodoka n’ umurinzi ubwo yavaga muri Miss Rwanda i Kigali.

Ubwo ijonjora ryo gushaka abakobwa 20 bagomba kujya muri Boot Camp ya Miss Rwanda 2019 ryari rirangiye mu ijoro ryo ku wa Gatandatu tariki 05 Mutarama i Gikondo ahabera Expo, Mwiseneza wari ufite abafana benshi ku rwego rwo hejuru yagaragaye ataha mu modoka ya Toyota TXL afite n’umurinzi.

Menya ku by'imodoka n' umurinzi byahawe Mwiseneza Josianne yavaga muri Miss Rwanda i Kigali
Mwiseneza ku bwo gutorwa cyane yerekeje muri Boot Camp

Mwiseneza wabonye itike imujyana mu mwiherero wa Miss Rwanda 2019 kubera umubare w’abafana benshi bamutoye yavuze ko n’ubwo atazi uko byagenze kugirango abone umurinzi n’imodoka, bishoboka ko abantu bayimuhaye ari abashakaga ko atongera kugenda n’amaguru.


Yagize ati: “Nabonye imodoka nyigendamo ibindi ntabyo nzi, Sinzi uko byagenze ngo bayizane pe!,  yarantwaye ingeza mu rugo. Gusa yaje nyuma y’uko abantu bari kunsagarira bagatuma ntisanzura, abafana bari banyuzuyeho banze kundekura. Buriya ni umuntu wavuze ati ‘atongera kugenda n’amaguru’ aritanga ampa imodoka yo gutahamo, yarakoze cyane.”

imodoka n' umurinzi byahawe Mwiseneza Josianne yavaga muri Miss Rwanda i Kigali
Yatashye mu modoka nziza ubwo yavaga muri Miss Rwanda i Kigali

Mwiseneza avuga ko icyo uyu murinzi yakoze ari ukumuhuza n’umuryango we wari watatanye kubera abafana bari bamwuzuyeho bashakaga kumugumana.

Yahawe imodoka n’ umurinzi wa kompanyi ya B-KGL isanzwe ikora akazi ko gukurikirana ibijyanye no kurinda umutekano w’abahanzi batandukanye no mu bitaramo.

Uyu Mwiseneza Josianne uri kuvugisha buri muntu wese ukurikirana imyidagaduro mu Rwanda, yiyamamarije guhagararira intara y’Uburengerazuba muri Miss Rwanda 2019, yageze ku Inzozi Hotel (yabereyemo ijonjora ry’ibanze) iri mu birometero bisaga 10 uvuye mu mujyi wa Rubavu agenda n’amaguru ndetse ahagera yasitaye. Ibi ni byo byatumye abantu bamumenya ndetse baniyemeza kumufasha ntazongere kugenda n’amaguru.

Kuva ubwo yagize abafana benshi kurusha undi mukobwa uwari we wese uri muri iri rushanwa.

Mwiseneza Josianne yarenze imbibi z’abavuga ko iri rushanwa ari iry’abakobwa bo mu bakire, intego ye akaba ari uguha yegukanye ikamba rya Miss Rwanda 2019. Umushinga wa Mwiseneza Josianne akaba ari ‘ukuvugira abana b’abakobwa bo mu cyaro bitinya mu bintu runaka ndetse akarwanya n’imirire mibi’.

Ku mbuga nkoranyambaga zitandukanye, abantu benshi cyane bari gusaba abategura irushanwa rya Miss Rwanda ko bazambika ikamba rya Miss Rwanda 2019 Mwiseneza josiane n’ubwo bose batabivugaho rumwe.

IREBERE VIDEO NHYA YA EESAM YISE WOWE GUSA:

TANGA IGITEKEREZO KURI IYI NKURU