Inzego zishinzwe ubuzima muri RDC zatangaje ko icyorezo cya Ebola kimaze gukaza umurego kuko kimaze guhitana abantu barenga 400 mu ntara y’Iburasirazuba n’iy’Amajyaruguru ashyira Iburasirazuba bw’iki gihugu.

RDC: Abarenga 400 bamaze guhitanwa na Ebola

Minisiteri y’Ubuzima muri RDC kuri uyu wa Kabiri yatangaje ko ‘kuva iki cyorezo cyakongera kugaragara, abantu 658 ari bo bamaze kugaragaza ibimenyetso bya Ebola, muri bo 609 nibo byemejwe ko bayirwaye mu gihe 49 byaketswe. Igiteranyo cy’abamaze guhitanwa na yo ni 402’.


VOA yanditse ko aba bahitanwe na Ebola ari abo mu Ntara ya Kivu y’Amajyaruguru n’iya Ituri. Inzego z’ubuzima kandi zatangaje ko habaruwe abantu 237 bakize Ebola, mu gihe abandi 200 bagikurikiranwa.

Minisiteri y’Ubuzima muri RDC, ku cyumweru yavuze ko hari impinduka nziza mu Ntara ya Beni kuko ngo nta barwayi bashya bahagaragaye kugeza ku cyumweru gishize, muri aka gace kugarijwe n’ubwicanyi bukorwa n’abarwanyi ba ADF bakomoka muri Uganda.

Inzego z’ubuzima zivuga ko guhera ku itariki ya 8 Kanama 2018 ubwo hatangiraga igikorwa cyo gukingira, abantu 60.460 bamaze gukingirwa, abagera kuri 19.952 ni abo muri Beni.

Ni ku nshuro ya 10 RDC yibasirwa n’icyorezo cya Ebola kuva cyagaragara mu 1976 mu Ntara ya Équateur iri mu Majyaruguru ashyira Uburengerazuba bw’iki gihugu.

Abarenga 400 bamaze kwicwa na Ebola kuva yagaragara ku nshuro ya 10 muri RDC
Abarenga 400 bamaze kwicwa na Ebola kuva yagaragara ku nshuro ya 10 muri RDC

IREBERE VIDEO NHYA YA EESAM YISE WOWE GUSA:

TANGA IGITEKEREZO KURI IYI NKURU