Inzego z’umutekano muri Uganda zikomeje inkubiri yo guta muri yombi Abanyarwanda no kubafunga mu buryo bunyuranye n’amategeko, aho bahatirwa gukora imirimo y’uburetwa.

Abandi Banyarwanda batanu bari muri Uganda bagaruwe mu gihugu

Kuri uyu wa Gatanu, tariki ya 8 Gashyantare 2019, Abanyarwanda batanu barimo abagabo bane n’umukobwa umwe boherejwe mu gihugu nyuma y’igihe bafungiye muri Uganda.


Aba Banyarwanda banyura ku mupaka ndetse bagahabwa n’ibyangombwa by’urugendo ariko bagera mu nzira bagafatwa, utabonye amafaranga atanga, akajyanwa gufungwa.

Ntigura Alphonse wo mu Murenge wa Muzo mu Karere ka Gakenke yafatiwe muri Uganda ku wa 27 Nzeri 2017, agiye gushaka umuti w’umwana.

Yatangarije IGIHE ko yageze ku mupaka asinyirwa uruhushya rw’umunsi umwe, ageze Nyakabande aho yari yarangiwe umuganga asanga yagiye Kampala.

Yagize ati: “Abo nasanze bansabye ko twajyana kumureba Kampala. Twagiye mu modoka tugeze mu nzira badusaba ibyangombwa, basanga icyanjye cyarenzeho amasaha make, bahita banjyana kuri polisi bambwira ko bagomba kumpana.’’

Yakomeje ati: “Iyo bakigufata uba wihebye, wumva utazagaruka mu gihugu. Iyo bagukatiye urangiza igihano wahawe. Gufunga kwabo bagutwara kubumba amatafari, kwikorera ibiti, no kubaka n’indi mirimo ivunanye.”

Ubuze impongano akanirwa urumukwiye

Ntigura wari umaze umwaka n’amezi ane yavuze ko umuntu ufashwe asabwa gutanga miliyoni ebyiri z’amashilingi muri Uganda, akabakaba ibihumbi 500 Frw ngo arekurwe.

Ati: “Narayabuze nkora icyo gihano. Nafungiwe muri gereza ya Kisoro, nyuma y’iminsi itatu njye n’abandi Banyarwanda 40 twoherejwe muri gereza ya Kabale. Twageze muri gereza batubwira ko twese turi bamwe ariko harimo ihohoterwa kuko baduha ibihano birebire.’’

Uwitwa Ntirenganya Emmanuel wari umaze amezi abiri afungiye muri Uganda, we yanyazwe ibyangombwa by’amezi atatu, barabishanyura, bamujyana kumufungira Kisoro.

Yagize ati: “Bantaye muri yombi kuko ndi Umunyarwanda. Umusirikare wamfashe yahishe ibyangombwa byanjye avuga ko ndi Umunyarwanda ngomba gusubira iwacu.’’

Yakomeje ati: “Banjyanye mu rukiko ndisobanura, mvuga ko nzira ubusa. Barambabariye ariko bamfunga amezi abiri. Icyo gihe twirirwaga duhinga, usuzuguye bakamukubita, batubwiraga ko imirimo twaje gushaka muri Uganda tuyibonye. Ntibantoteje cyane ariko barankubise.’’

Mu buhamya bw’abafatwa, bamwe bavuga ko Umunyarwanda muri Uganda batamwishimiye, ndetse hari ababishimangira n’amagambo yabo.

Nizeyimana Innocent yafashwe agiye gushaka akazi mu Mujyi wa Kampala, afungwa amezi abiri n’iminsi 18.

Yagize ati: “Bamfashe iminsi itararangira mfite ibyangombwa. Ku mupaka bari bampaye iminsi itatu ariko sinasoma neza. Nateze imodoka bankuramo, banjyana kuri gereza. Ubu nari nageze mu rukiko nkiri kuburana.’’

Niyonteze Jean de Dieu yafungiwe Kisoro, aho yari yatemberereye, amara iminsi itatu muri gereza atazi uko ifunguro risa.

Ati: “Bampagaritse ndi kumwe na mugenzi wanjye muri Uganda. Bamfunze iminsi itatu. Harimo Abanyarwanda benshi muri Gereza kandi bafungwa byihariye. Bamfashe ku wa Kabiri, ntibigeze batugaburira. Iyo bagufunze ntibakugaburire iryo ni ihohoterwa. Abanyarwanda ntibahita bashyirwa mu bitabo, baba bashaka kubaka amafaranga. Iyo umwe umuhaye amafaranga, akoherezaho undi.’’

Niyonteze yavuze ko bamunyaze ibihumbi 30 by’amashilingi, angana na 7550 Frw, ariko abandi Banyarwanda 16 batari bayafite baguma mu maboko ya polisi.

Umukobwa witwa Dusabirema Pauline utuye muri Ngororero wagiye ku wa 5 Gashyantare 2019, yavuze ko yafashwe ageze Nyakabande kandi afite uruhushya.

Yagize ati: “Banjyanye muri gereza nsangayo abandi Banyarwanda. Twari tumaze iminsi itatu tutarya, turi kurara ahantu habi. Nubu meza nabi sindarya, kugira dutahe abapolisi banyaze imitwaro 50 ikoreshwa muri Uganda, akabakaba ibihumbi 120 Frw. Niyo yabaye ikiguzi cyo gutaha. Hari abandi bagore barimo n’abatwite nasizemo, nibabona amafaranga nibwo bazataha.’’

Inama ku Banyarwanda bajya muri Uganda

Abanyarwanda benshi bava muri Uganda barakorewe iyicarubozo, ibirenge byarabyimbye, hari n’abamburwa amafaranga yose baba bafite bakabona kurekurwa.

Abatanze ubuhamya bose bahurije ku kwitondera kwinjira muri Uganda mu gihe hakiri umwuka mubi ushingiye ku ifatwa rya hato na hato ry’Abanyarwanda.

Ntigura Alphonse yavuze ko “Abanyarwanda bashaka kujya muri Uganda bakwiye gushishoza mbere yo kwerekezayo cyangwa bagahitamo gukorera akazi mu Rwanda bakiteza imbere.’’

Ikibazo cy’Abanyarwanda batabwa muri yombi gikomeje gufata indi ntera. Kuva mu 2017, Abanyarwanda baba muri Uganda batangiye gutabwa muri yombi mu mikwabo itandukanye, bakorerwa iyicarubozo, bamwe bagarurwa mu gihugu binyuranye n’amategeko.

Mu minsi itatu gusa kuva ku wa 6 Gashyantare 2019, Abanyarwanda 18 bari bafungiye muri Uganda bagaruwe mu gihugu, barimo n’abakorewe ibikorwa bibabaza umubiri.

Abanyarwanda batanu bafatiwe, bakanafungirwa muri Uganda boherejwe mu gihugu
Abanyarwanda batanu bafatiwe, bakanafungirwa muri Uganda boherejwe mu gihugu

<IREBERE VIDEO NHYA YA EESAM YISE WOWE GUSA-Ntiwibagirwe GUKORA SUBSCRIBE:

TANGA IGITEKEREZO KURI IYI NKURU