Nzagupfira Episide 1, wakwibaza impamvu yabyo ariko byagorana kubona igisubizo, kuko niko ikiremwa muntu kisanze, kandi si cyo gusa, kuko nta Nka ijya igirana ubucuti n’Ingurube! 

Nzagupfira Episide 1 - Inkuru z'urukundo

Iryo si Itegeko ryanditse, ahubwo niko byose byisanze, ngo “niba uri umushoferi, uba ugomba gusangira n’abo muri mu rwego rumwe. Waba umuhinzi ugasangira na bagenzi bawe mu kabari kari mu mudugudu. Niba uri umunyeshuri akenshi uzisanga incuti zawe nyinshi ari abanyeshuri!”


Bityo niyo ubonye bidacuditse  ntubitinda ho!  Ariko na none buriya ufashe Intama, ukayibanya n’Inka, iyo hashize igihe usanga byombi bifitanye umubano udasanzwe! Mu by’ukuri Intama ntiba yabaye Inka. Ahubwo uko bitindana, bisangira, binyagirwana,… Ibi nibyo bitera Ubucuti budasanzwe!

Ibi kandi Uzabisanga no mu bigo by’amashuri, mu Nsengero, mu bacuruzi,…! Uko ugirana ubucuti n’umuntu cyangwa Ikintu, mu buryo utazi wisanga mwabaye incuti! Ibi bizwi cyane n’Abatunzi, niba waragize amahirwe, cyangwa se Ibyago byo kuragira Ihene ariko ukaba ukunda kuziha utuntu, cyane cyane iyo ari nk’imwe cyangwa ebyiri, kuburyo ubasha kuzitaho uko bikwiye, wisanga mwarabaye inshuti zikomeye kuburyo n’iyo uziragiye utongera kwitwaza Inkoni kuko ugenda zikakoma Inyuma!

Ibi Ndakeka ari ikimenyetso kerekana ko no kubantu bishoboka! Iyi nkuru y’Urukundo Tugiye gutangira ndifuza ko wazagira icyo uyungukira mo kandi kikaba Cyiza!  Ibibi uzabyigire ho gukora Ibyiza! Amarira uzayabyaze Ibishimo! Nzashimishwa no kubona umbwira ko inkuru yakuryoheye! Nanjye nisanze Ntyo.

Ngukunda ntakuzi ibyo bimpatira kugerageza ibyiyumviro byawe, nshobora kukubabaza ariko mba Ngamije Kugushimisha!

Niba Unkundiye reka dutangire Nzagupfira Episide 1

Dutangiriye mu murima, umukobwa ari kumwe n’Umubyeyi uyingayinga mu myaka 45 y’Amavuko! Uwo mukobwa ari gutera Intabire, kandi ari kubikorana ubwitonzi, ari nako avanga mo uturirimbo dutandukanye! wa mubyeyi yakebutse inyuma ye abona wa mukobwa arashishikaye cyane! Ibyo byamuteye kuzenga amarira mu maso!

Wa mukobwa yunamutse abona uwo mubyeyi ari kwihanagura Amarira, uwo mukobwa yahise atungurwa, niko gushyira hasi Imigozi (y’Ibijumba) yari afite maze asanga uwo mubyeyi, amubazanya Ubwitonzi agira ati “Mawe, ubaye iki gitumye ushavura ko ntabyo nkuzi ho?” wa mubyeyi niko kumubwira ati “Mwana wanjye, Nanjye simbizi nahereye kare numva uturirimbo waruri kuririmba bintera kunezerwa, Sinzi ukuntu nibutse ko uyu munsi ari wo wanyuma nkubonye uririmba bintera intimba! ” umukobwa ati “Ariko se Mama ibyo nibyo bigutera Ishavu boshye ko Njyiye ubutazagaruka?

Humura nzajya ntaha mu kiruhuko! Byari kumbera byiza iyo ngumana nawe, Ariko kuko nsabwa Kwiga kugira ngo nzagusindagize igihe uzaba umaze kugwa Agacuho, ngomba kwirengagiza udukuru wajyaga umbwira , Imigani wanciraga iyo nabaga Njyiye kuryama ndetse n’utundi tuntu twiza wankoreraga, maze nkerekeza aho ntigeze nkandagira n’umunsi n’umwe.

Wa mubyeyi ati “Mwana wanjye, Uragiye ariko uzihangane uzirinde kururu kururu n’Udusore twiyo mu mijyi, njya numva ngo ni uducakura tutazagucira ho Imigani, ngo twakuboneye Ibanga ry’Urukundo, iryo ni Iryawe n’uwo muzashakana! Mwana wanjye uramenye ntuzatume niyahura kuko sinakwihanganira kubaho igihe cyose nzabona unteye Intimba kandi ari wowe mfite. Nyoko yakunsigiye ufite umunsi umwe, none ubu ugize Imyaka 18, Mwana wanjye nkuzi bihagije, uramenye ntuzige Imico y’ahandi! Uzahore uri Nyirasoni ntizazishire, uzahore uri Mutembanshyushyu ntuzabe Musinzikazi! Mwana wanjye uzahore uri Inyuma mu gukora ibibi, maze ube Nyambere muguhesha Ishema Urwakubyaye!…”

Ibyo byose yabivugaga uwo mukobwa yicaye iruhande rwe, umukobwa nawe ati “Mama wandeze Gitore, Untoza Ubunyangamugayo, undinda Ishavu n’igisa nkaryo, wampaye uburere nari nkeneye bwose! Mawe ntacyo nakuburanye ugifite! nubwo kuba iyo mu mujyi bigoye, ariko Humura! Nzahora ndi Muhorakeye nkuko warinyise, Ngaho reka nsoze iriya ntabire nze dutahe njye gucana nshyushye Imboga dusamure!” undi nawe  ati “reka nze ngufashe tunaganire kuko Njyiye kwicwa n’Irungu!…”

Ku munsi wakurikiye uwo, Muhorakeye yabyutse kare, aritegura! Ubundi yinjira mu cyumba cy’Umubyeyi we aramubwira ati “Mama, reka njye kongera Ubumenyi, minuze kahave! Reka Njye kuzana Ishema kuko wantoje kuba Nyirishema! Mubyeyi reka nterure amagambo ya Nyuma maze ngusezere! Urabeho mubyeyi wanjye, Nzagukumbura cyane!” wa mubyeyi nawe yamusubije agira ati “Akira Ibarwa yawe!” yahise amwongorera ati “Uzarinde Ubusugi bwawe, ni iyo mpamba nakugeneye!”

Umukobwa yasohotse mu cyumba cy’Uwo mubyeyi yarize byacitse! Maze yerekeza gutega imodoka yagombaga kumugeza i Kigali,  Aho yari agiye gukomereza amashuri ye muri Kaminuza. Nyuma y’amasaha arenga 2 yari ageze i Kigali!

Gusa yajyaga kwambuka umuhanda akabona imodoka iturutse imbere ye agahita akata.

Ku rundi ruhande: mu nzu nziza cyane ikikijwe n’Igipangu cy’amatafari y’Impunyu, murugo rusa neza rwose  kubera indabo z’ubwoko bwose kandi nziza! Hari Umuryango wicaye ku meza!  Hari mo; Umusore uri mukigero k’imyaka 21, ariko bigaragara ko yakuze neza rwose! Nuko uwo musore ati “Papa ko utaza se ngo ungeze yo? Ubu ntege moto koko?” uwo mugabo yita Se, aramubwira ati “Umva rero Kevin nkubwire! Imodoka iri hariya, genda witware niba bikunaniye ugende n’amaguru, Ubundi ko Nyoko ahari wamubwiye akagutwara?” Umubyeyi wicaye aho nawe ati “Ariko ye, arabura kuntwara ngo nijye umutwara? Niba ntaramutwaye narasibye! Nagende yitware, kuko mbona na mushiki we yitwara! Ahubwo haguruka ugende!”

Umusore abonye bamushwishwurije, ahita mo kwatsa Imodoka aragenda!…

Tugarutse aho wa mukobwa ari; Na n’ubu aracyari muri bya bindi, bamwe batangiye gukeka ko arwaye mu mutwe, yahise ashinyiriza aterura Igikapu, ubundi ajya kwambuka, ateye intambwe nk’ebyiri abona imodoka ije yarara! ahita asubira inyuma, ya modoka imuca ho, ubundi agiye kwambuka yongera gutinya. Ya modoka yageze imbere, irakata maze isubira inyuma. Igeze ha handi wa mukobwa ari,uwati utwaye imodoka avuza Ihoni! Umukobwa ahita yikanga! Uwari muri ya modoka, yahise amanura ibirahuri byayo, maze apepera ya nkumi. Ariko umukobwa yasaga n’uwataye umutwe, wa musore yahise ava muri ya modoka, maze agenda asatira Muhorakeye! Umusore yasaga na Kevin! Ese koko ni Kevin???

Iherezo rya Nzagupfira Episode 1

Umwanditsi : DUSHIMIMANA Samuel (Sam’Story)

IREBERE VIDEO NHYA YA EESAM YISE WOWE GUSA-Ntiwibagirwe GUKORA SUBSCRIBE:

TANGA IGITEKEREZO KURI IYI NKURU