Umutoza w’Umunyarwanda Cassa Mbungo André ari mu gihugu cya Kenya aho yamaze gusinya amasezerano y’umwaka umwe n’igice  muri AFC Leopards isanganywe umunyezamu w’umunyarwanda Ndayishimiye Eric Bakame.

Iyi kipe bita ‘Ingwe’ mu Mujyi wa Nairobi yatandukanye n’uwari Umutoza Mukuru wayo, umunya-Serbia, Marko Vasiljevic weguye kuri uyu wa Mbere tariki 5 Gashyantare 2019.

Gusa yeguye AFC Leopards ishobora kumwirukana n’ubundi kuko yari yamaze gutumaho Cassa Mbungo André, umutoza abayobozi b’iyi kipe bagerageje gusinyisha mu Ukwakira 2018 ariko ntibumvikana ku mafaranga agomba guhabwa.

Mbungo yageze i Nairobi ku wa Gatanu tariki 1 Gashyantare 2019, agirana ibiganiro n’abayobozi ba AFC Leopards iminsi itatu biza kurangira asinyishijwe imyaka ibiri asabwa gusubiza iyi kipe mu marushanwa ya CAF kuko uyu mwaka itashoboye gusohokera Kenya.

Umunyamabanga wa AFC Leopards, Timothy Lilumbi, yahamije aya makuru aho yavuze ko Cassa Mbungo bamwifuzaho gutwara kimwe mu bikombe bikinwa muri Kenya.

Lilumbi yagize ati “Uyu mutoza (Cassa Mbungo André) afite inararibonye kandi yegukanye ibikombe bitandukanye mu Rwanda. Nta gushidikanya ko hari icyo aje kongerera abakinnyi bacu kuko dusanganywe ikipe nziza. Twizeye ko azadufasha gutwara igikombe no kubona itike y’amarushanwa ya CAF.”

Cassa Mbungo André yahawe amasezerano yizewe kubera ibikombe by’Amahoro yahesheje amakipe abayobozi ba AFC Leopards bita mato, AS Kigali mu 2013 na Police FC mu 2015.

Abaye undi munyarwanda winjiye muri Shampiyona ya Kenya nyuma y’abakinnyi barindwi bahabarizwa barimo na Ndayishimiye Eric Bakame asanze muri AFC Leopards.

TANGA IGITEKEREZO KURI IYI NKURU