Buri mu kinnyi wa Rayon Sports yemerewe ibihumbi 380 mu gihe bazaba batsinze ikipe ya APR FC kuri uyu wa Gatandatu.

Abakinnyi ba Rayon Sports bakoze imyitozo ibanziriza iya nyuma ku mugoroba wo kuri uyu wa Kane, bemereye abayobozi n’abafana ko biteguye gutsinda mukeba wabo APR FC. Ku ikubitiro agahimbazamusyi katanzwe na Blue Winners Fan Club iyobowe na Imbabazi Consolatrice yemeye gutanga ibihumbi 750 Frw ku bakinnyi 18 bazifashishwa ku mukino mu gihe Ihuriro ry’amatsinda y’abafana rizwi nka Fan Base ryo ryatanze amafaranga miliyoni 1.5 Frw.

Umuyobozi wa City Plaza, Paul Ruhamyambuga, we yemereye abakinnyi uko ari 18 ko nibatsinda uriya mukino azabaha miliyoni imwe y’amafaranga. Thadée Twagirayezu we yemeye gutanga ibihumbi 50 Frw ku gitego cy’intsinzi ariko agahabwa abakinnyi bose bazifashishwa ku mukino uko ari 18.

Komite ya Rayon Sports iyobowe na Paul Muvunyi yo yemeye gutanga ibihumbi 100 Frw ku bakinnyi 18 bazaba bifashishijwe ku mukino nk’uko isanzwe ibigenza iyo bari buhure na APR FC. Umunyarwenya uzwi ku izina rya Ndimbati we yijeje abakinnyi ko nibatsinda mukeba azabaha amafaranga kandi menshi n’ubwo atatangaje umubare uwo ari wo.

Uteranyije aya mafaranga yose hamwe aragera kuri miliyoni 6.850 Frw wayagabanya abakinnyi 18 bazifashishwa ku mukino ugasanga nibura ko buri mukinnyi azabona ibihumbi 380 Frw.

Si ubwa mbere muri Rayon Sports hatanzwe amafaranga menshi ategerwa abakinnyi kugira ngo begukane intsinzi kuko ubwo iyi kipe yageraga mu matsinda ya Caf Confederations Cup umwaka ushize buri mukinnyi wa Rayon Sports yahawe amadorali 1500 angana na miliyoni 1.4 Frw ndetse no gusezerera ikipe ya Lydia Ludic (LLB) barahawe ibihumbi 500 Frw buri umwe.

TANGA IGITEKEREZO KURI IYI NKURU