Igikomangoma Harry na Meghan baciye agahigo kihariye ku rubuga rwa Instagram, mu masaha make bafunguye konti yahise ikurikirwa n’abasaga miliyoni eshatu.

Harry na Meghan baciye agahigo kadasanzwe kuri Instagram

Harry na Meghan bagishyingiranwa bagizwe Duke na Duchess b’agace ka Sussex. Mu gihe bitegura kwibaruka imfura yabo, bafunguye konti kuri Instagram ihita ikurikirwa mu buryo budasanzwe.


Guinness World Records yatangaje ko aba bombi bakoze agashya katigeze gakorwa n’undi wese ku Isi, mu masaha atanu n’iminota 45 bakimara gufungura konti yabo bise @sussexroyal yahise ikurikirwa n’abantu miliyoni

Iyi konti ya Harry na Meghan bayifunguye ku mugoroba wo ku wa Kabiri tariki ya 2 Mata 2019, kugeza ubu ikurikiwe n’abantu miliyoni eshatu n’ibihumbi Magana atanu.

Sussex Royal

Harry na Meghan baciye agahigo kadasanzwe kuri Instagram

Ni umuhigo aba bombi bihariye ku Isi. BBC yatangaje ko uwaherukaga gukora ibisa nk’ibi ari umuhanzi wo muri Korea Kang Daniel wakurikiwe na miliyoni y’abantu mu masaha 11 n’iminota 36 agifungura konti muri Mutarama 2019.

Konti ya Harry na Meghan ngo izajya ikoreshwa mu “gutambutsa amatangazo ya ngombwa cyane” no gusangiza Isi imishinga ikomeye bafite. Kuri ubu bakurikiwe n’abarenga Miliyoni 3.5 nyuma y’iminsi ibiri gusa konti yabo ifunguwe.

Harry na Meghan baciye agahigo kadasanzwe kuri Instagram

Kang Daniel yafunguye konti ye ku Bunani ahita asimbura Papa Francis wageze kuri uyu muhigo mu masaha 12 akimara kujya kuri Instagram. Papa Francis we yabigezeho mu 2016 ari nabwo yagiye kuri uru rubuga bwa mbere.

David Becham na we yakoze agashya, akijya kuri uru rubuga mu 2015 yahise akurikirwa n’abantu miliyoni imwe mu masaha 25 gusa.

Meghan yafunze imbuga nkoranyambaga yakoreshaga zose mu mwaka ushize mbere y’uko arushingana na Harry muri Gicurasi 2018.

Mu Ukuboza 2017 akimara kwambikwa impeta y’urukundo, Meghan yari akurikiwe na miliyoni 1.9 kuri Instagram, kuri Twitter yari afite 350,000 naho kuri Facebook akagira 800,000.

Sussex Royal

TANGA IGITEKEREZO KURI IYI NKURU