Nsabimana Callixte wamenyekanye nka Sankara, yemereye urukiko ibyaha aregwa, anasaba abanyarwanda n’Umukuru w’Igihugu imbabazi ku bw’ibikorwa by’umutwe yari ayoboye byishe abaturage.

Kuri uyu wa Kane, Nsabimana yitabye Urukiko rw’ibanze rwa Gasabo kugira ngo amenyeshe ibyo aregwa. Yari kumwe n’umwuganizi we mu mategeko Nkundabarashi Moïse wanamwunganiye ubwo yari mu bushinjacyaha.

Iburanisha ry’uyu munsi ryari rigamije kumenyesha Nsabimana ibyaha aregwa no kuburana ku ifungwa n’ifungurwa ry’agateganyo. Ni iburanisha ryamaze amasaha atatu mu cyumba cyari kirimo ubwiganze bw’abanyamakuru bakorera itangazamakuru ry’imbere mu gihugu no mu mahanga.

Ubushinjacyaha bwagaragaje ko Nsabimana binyuze mu mutwe w’ingabo utemewe witwa MRCD yari abereye Visi Perezida, yagize uruhare mu bitero byagabwe mu Majyepfo y’u Rwanda, bigahitana abaturage icyenda, 19 bagakomereka ndetse n’imitungo myinshi igasahurwa.

Uyu mugabo w’imyaka 37 wize amategeko muri Kaminuza y’u Rwanda na ULK, yashinjwe ibyaha 16 birimo iremwa ry’umutwe w’ingabo ritemewe, icyaha cy’iterabobwoba ku nyungu za politiki, gukora no kugira uruhare mu bikorwa by’iterabwoba no gutanga amabwiriza mu gikorwa cy’iterabwoba.

Hari kandi kuba mu mutwe w’iterabwoba, icyaha cyo kugambana no gushishikariza abandi gukora iterabwoba, ubwicanyi n’ubwinjiracyaha bw’ubwicanyi, gufata bugwate, gukwiza amakuru atariyo cyangwa icengezamatwara rigamije kwangisha leta y’u Rwanda mu bihugu by’amahanga.

Harimo ndetse guhakana Jenoside, kwiba yitwaje intwaro, gutwika, kugirana umubano na leta y’amahanga hagamijwe gushoza intambara, gukora cyangwa gukoresha impapuro mpimbano, gukubita no gukomeretsa ku bushake no gutanga, kwakira no gushishikariza kwakira ibikomoka ku iterabwoba.

Ubushinjacyaha bwagaragaje ibimenyetso bushingiraho busabira uyu mugabo gufungwa iminsi 30 y’agateganyo mu gihe iperereza rikomeje ku byaha aregwa, bushingiye ku kuba yari mu mutwe w’ingabo zitemewe washinzwe na MRCD abereye Visi Perezida wa Kabiri.

Mu kwiregura kwe, yemeye ibyaha aregwa avuga ko bimwe yabikoze ku giti cye ibindi bigakorwa n’umutwe yari abereye umuyobozi.

Ubushinjacyaha bwavuze ko uyu mutwe wa FNL wagize uruhare mu bitero byagabwe mu Majyepfo y’igihugu bigahitana abaturage icyenda, abandi 19 bagakomereka.

Nsabimana yavuze ko yasanze kuba harishwe abasivili, nta kindi yakora uretse kwemera ugutsindwa yagize nk’umwe mu bari abayobozi.

Ati “Niyo mpamvu imbere yanyu nyakubahwa mucamanza, nsaba imbabazi mbikuye ku mutima abantu bose bagizweho ingaruka na biriya bitero, abitabye Imana navuga nti Imana ibahe iruhuko ridashira, nkaba nsaba imbabazi Abanyarwanda, nkasaba n’imbabazi Umukuru w’Igihugu.”

Yavuze ko asanga FLN atari inyeshyamba zitanga icyizere, akaba ari “nayo mpamvu nitandukanyije na FLN.”

Ubushinjacyaha bwagaragaje ko abaterankunga b’uwo mutwe barimo Leta y’u Burundi yabaye inzira y’aho gutera baturutse mu ishyamba rya Kibira rifatanye na Nyungwe, hakabamo na Leta ya Uganda yatanze ibikoresho n’abantu bajyana abarwanyi mu birindiro bya FLN muri RDC.

Kuri ibi, icyo cyaha nacyo yavuze ko acyemera akanagisabira imbabazi, ko ibyo Ubushinjacyaha bumurega butamubeshyera ku mubano yagiranye n’abasirikare bakuru b’u Burundi na Uganda.

Yavuze ko igihe bamufataga yari amaze kuvugana na Maj. Bertin wo mu Ngabo z’u Burundi, wamufashije nka FLN mu gukura abasirikare muri RDC, bagaca mu Kibitoke bagakomeza mu ishyamba rya Kibira, bagakomeza muri Nyungwe.

Yavuze ko ariko u Burundi nta gikoresho cya gisirikare bwabahaye, kandi n’uburyo babikoraga butari buzwi n’ubuyobozi bw’igihugu kuko hari n’ubwo abasirikare babo bafatwaga.

Ku bijyanye na Uganda ho, yavuze ko yagiranye umubano na bamwe mu basirikare bakuru baho ndetse ubwo bamufataga, muri telefoni ye harimo ifoto y’umwe mu basirikare bakuru ba Uganda yari amaze kohererezwa na Capt. Sande Charles usanzwe ari Umuyoboke wa RNC.

Ati “Twarabanye, twarakoranaga nkiri muri RNC.”

Sande ngo yamusabiye kwakirwa kwa Brig. Gen. Kandiho, uyobora urwego rwa gisirikare rushinzwe iperereza muri Uganda. Nsabimana ngo yavuganye na Gen. Wilson Irategeka, bafata umwanzuro wo koherezayo Gen. Maj. Sinayobye Barnabé, ajyana n’undi musirikare we atabashije kumenya izina.

Bageze muri Uganda ngo basanze Brig. Gen. Kandiho yagize izindi gahunda, yohereza Colonel ushinzwe iperereza ryo hanze “ni we wabonanye n’izo ntumwa zanjye.”

Yavuze ko baganiriye ku gusaba ibikoresho bya gisirikare n’ubufasha muri dipolomasi, ku buryo ngo intumwa zavuyeyo zivuga ko “ubufasha twasabaga babutwemereye’.

Ati “Nkaba narafashwe twarateganyaga ko intumwa zacu zisubirayo kugira ngo basoze neza ibijyanye n’ishyirwa mu bikorwa ry’ibyo bari batwemereye.”

Yakomeje avuga ati “Nyakubahwa mucamanza icyo cyaha nacyo nkaba nkemera, nkicuza, nagisabira imbabazi.”

Umushinjacyaha yavuze ko kuba Nsabimana yemera ibyaha byose aregwa, bishimangira impamvu zikomeye Ubushinjacyaha bushingiraho busaba ko afungwa by’agateganyo.

Me Nkundabarashi Moise wunganira Nsabimana yavuze ko umikiliya we hari amakuru menshi yatanze n’inyandiko zafashwe, ku buryo ashobora kurekurwa agakurikiranwa adafunzwe, kuko atabangamira iperereza.

Mu gusoza Nsabimana yagize ati “Icyo nongeraho ni uko nemera ibyaha nakoze nkanabisabira imbabazi kuko njye nk’umuntu wize amategeko nzi ingaruka zo kuruhanya mu butabera, nzi n’inyungu yo korohereza ubutabera. Njye nkaba ntiteguye kuburana urwa ndanze ku byaha mfitiye ibimenyetso. Hari ibyaha byabaye ku mugaragaro, n’inyoni zo mu biti ubwabyo zabinshinja. Murakoze.”

Nyuma yo kumva impande zombi, urukiko rwavuze ko umwanzuro uzasomwa ku wa 28 Gicurasi 2019.

Yatawe muri yombi ku wa 13 Mata 2019, u Rwanda rwemeza ko rumufite ku wa 30 Mata 2019. Tariki ya 17 Gicurasi 2019 ku Cyicaro Gikuru cy’Urwego rw’Igihugu rw’Ubugenzacyaha (RIB) ku Kimihurura nibwo yeretswe itangazamakuru.

Src:Igihe

TANGA IGITEKEREZO KURI IYI NKURU