Patrick Senyonjo umaze kwamamara cyane nk’ umuraperi Fresh Kid akaba amaze igihe avugisha benshi muri Uganda yongeye kugaruka mu itangazamakuru, nyuma yo gutumirwa mu bihembo mpuzamahanga bizatangirwa muri Leta Zunze Ubumwe za Amerika.

Nyuma yo kuvugisha abatari bacye, umuraperi Fresh Kid yatangiye guhamagarwa mu bihembo mpuzamahanga

Umuraperi Fresh Kid w’imyaka irindwi yahamagawe mubagomba guhatanira ibihembo byitwa Carolina Music Video Awards biturutse ku ndirimbo ye yitwa ‘Bambi’ yo muri Mata 2019.

Ibi bihembo biteganyijwe ko bizatangwa ku itariki 20 Nyakanga 2019 muri NASCAR Hall of Fame High Octane Theater iri mu Mujyi wa Charlotte muri North Carolina.

Umuraperi Fresh Kid ageze kuri uyu muhigo mushya nyuma y’aho asohoye indirimbo nshya yise ‘Sibirimu’ yatangiye gufatira amashusho. Iyi ndirimbo yayihuriyemo n’umwanditsi we w’indirimbo witwa 14K Bwongo.

Mu bandi bahanzi bakomeye amaze gukorana na bo harimo Lydia Jazmine mu ndirimbo yitwa ‘You & Me’, Ykee Benda muri ‘Singa’, Feffe Bussi mu yindi yitwa ‘Yes, No’.

Minisitiri w’Urubyiruko muri Uganda n’umuraperi ukizamuka Fresh Kid bemeranyije ko uyu mwana w’imyaka irindwi azakomeza ishuri akabifatanya no gukora umuziki nubwo mu mizo ye yari yabanje kumuhagarika ariko abadepite bakabyinjiramo.

Minisitiri Kiyingi yasobanuye ko guhoza Fresh Kid mu tubari bibangamira uburenganzira bwe nk’umwana kuko ashobora guhohoterwa cyangwa akahigira imico mibi. Uyu mwana yarakomorewe yemererwa gukora umuziki ariko ashyirirwaho uburyo bwihariye bwo kumurinda.

Minisitiri kandi yashyizeho umukozi uzajya akorana n’umujyanama wa Fresh Kid n’ababyeyi be agasuzuma niba uburenganzira bwe bwubahirizwa.

2 IBITEKEREZO

TANGA IGITEKEREZO KURI IYI NKURU