Perezida Paul Kagame yasabye abatuye uturere twa Rubavu na Rutsiro ko bakwiye gufata Repubulika Iharanira Demokarasi ya Congo, RDC, nk’isoko bashobora kubyaza umusaruro binyuze mu ishoramari, bakanoza ibikorwa byabo na leta ikabunganira aho ari ngombwa.

Kuri uyu wa Gatanu nibwo Perezida Kagame yagiranye ikiganiro n’abatuye uturere twa Rutsiro na Rubavu, aho bakoraniye mu Murenge wa Nyundo.

Yabwiye abaturage ko aheruka mu Karere ka Rubavu mu kwiyamamaza mu 2017 kandi icyo yifuzaga abaturage bagitanze, bityo nabo ibyo bifuza bagomba kubihabwa.

Ati “Icyo mwashakaga ni umutekano, ni amajyambere. Tugomba kubibaha byanze bikunze, tuzabibaha ari mwe bishingiyeho, kandi byose biva mu bufatanye. Mu bufatanye n’abaturage, n’abayobozi bose na bo bakumva ko ari inshingano yabo gukorera abaturage.”

Yavuze ko mu gihe hari imibanire myiza na RDC, ibihugu byombi byafatanya mu kubyaza umusaruro amahirwe bifite bigatera imbere.

Yakomeje ati “Mpereye no kuri ayo mahirwe yuko mufite abaturanyi, hari umujyi wa Goma, hari n’ibindi bice by’icyo gihugu, hari abantu benshi. Iyo hari abantu benshi, ni isoko, namwe ubwanyu muri isoko.”

“Habayeho uburyo rero bwo gukorana, ikibuze hamwe kikaboneka ahandi, abantu bakagenderana bikaba urujya n’uruza, abantu barunguka kurusha. Ariko nta we ugana mu baturanyi atabanje gutunganya ibye. Ubwo ni ukuvuga ngo ni isoko ryacu muri Rubavu cyangwa n’ahandi mufitanye imbibi, tubanje tukibonamo isoko ubwacu, tugakora, icyo gihe tubona aho duhera noneho dukorana n’abandi.”

Icyo gihe ngo leta yabunganira binyuze mu kuborohereza, “umutekano uboneke, kubana neza hagati y’ibihugu, no kuborohereza noneho mu buryo bw’imigenderanire.”

Iyo ngingo kandi ngo ikomeje kwibandwaho ari nayo mpamvu u Rwanda rwakuyeho viza ku banyafurika, hagamijwe korohereza abantu bashaka kuza mu Rwanda.

Yibukije abayobozi ko bagomba gukemura ibindi bibazo bafite, agaruka ku bibazo by’imihanda ikeneye kubakwa, amavuriro n’ikibazo cy’itumanaho rya telefoni ritaboneka hose muri Rubavu. Avuga ko nk’ikibazo cy’itumanaho agikurikirana ku buryo ababishinzwe baza kubitunganya.

Ati “Ndaza kubonana nabo, baraza kubitunganya mu buryo bumwe cyangwa ubundi. Baraza kubitunganya cyangwa se ababishinzwe ndaza kubatunganya.”

Ushaka gutera u Rwanda azabanze atekereze kabiri: Perezida Kagame I Rubavu

Perezida Paul Kagame yanagarutse ku mugezi wa Sebeya yanyuzeho imvura ihise agasanga “utamenya niba ari amazi cyangwa ubutaka bugenda nk’amazi”, asaba ko umuntu atabana nabyo gutyo. Yavuze ko yasobanuriwe ko hari imishinga yo kubungabunga aho uyu mugezi unyura kugira ngo udakomeza gutwara ubutaka.

Yabwiye abaturage ko leta izakomeza gushyira imbere umutekano ko ari wo utuma n’irindi terambere ryifuzwa, asaba abaturage kubigiramo uruhare.

Ati “Uwashaka guhungabanya umutekano wacu we, ngira ngo ajye atekereza kabiri mbere y’uko ashaka kubijyamo. Ababitekereza bagarukira mu mvugo gusa, burya barasakuza kurusha uko bashobora kubikora.”

Umuyobozi w’Akarere ka Rubavu Habyarimana Gilbert, yavuze ko uyu ari umunsi udasanzwe “kuko n’imvura itari iherutse hano iwacu yahaguye”, bityo ko ari umugisha yabazaniye.

Yavuze ko aka karere kiyemeje kuba irembo ry’ubucuruzi n’ubukerarugendo bitarenze umwaka wa 2024, ubu ibikorwa by’ubuvuzi bikaba bimaze kuba byinshi, amavuriro yubatswe muri buri murenge, hakaba hoteli n’izindi nyubako zishobora kwakira abantu 3000 mu ijoro, ko abikorera bakomeje gushora imari mu bikorwa bitandukanye birimo isoko rya Rubavu umunsi ryeguriwe abikorera n’ibindi.

Minisitiri w’Ubutegetsi bw’Igihugu, Prof Shyaka Anastase, yavuze ko abaturage bafitiye urukundo Perezida Kagame kuko imvugo ye ariyo ngiro, ndetse ibikorwa by’iterambere bikomeje kongererwa ubushobozi, aho nk’ibikorwa by’iterambere mu Karere ka Rubavu byahawe miliyari 9.5Frw, mu gihe zari miliyari 4Frw mu myaka ine ishize, ndetse no mu karere ka Rutsiro byariyongereye cyane.

Yavuze ko kubera ko Rubavu ifite urubyiruko rwinshi, ubuyobozi bukaba bwiyemeje kongera imbaraga mu guhanga imirimo mishya, kunoza ubuhinzi n’ubworozi n’ibindi.

Ushaka gutera u Rwanda azabanze atekereze kabiri: Perezida Kagame I Rubavu

Ushaka gutera u Rwanda azabanze atekereze kabiri: Perezida Kagame I Rubavu

Ushaka gutera u Rwanda azabanze atekereze kabiri: Perezida Kagame I Rubavu

Ushaka gutera u Rwanda azabanze atekereze kabiri: Perezida Kagame I Rubavu

Ushaka gutera u Rwanda azabanze atekereze kabiri

TANGA IGITEKEREZO KURI IYI NKURU