Bimaze kuba nk’ihame ntakuka ko gukora imyitozo ngororamubiri mu buryo buhoraho bigabanya ibyago byo kurwara zimwe mu ndwara z’ibyorezo zirimo umutima, kugira ibibazo by’amagufwa, diabète n’izindi; ariko burya ngo bigira n’akamaro mu kwitegura gutera akabariro.

Ubushakashatsi buherutse gushyirwa hanze bwagaragaje ko umuntu ukora imyitozo mu buryo buhoraho bimugirira akamaro n’ubushake bw’inyongera mu gihe cyo gutera akabariro.

CNN itangaza ko ku bagabo gukora imyitozo myinshi babifata nka Viagra karemano, bituma n’ibyago byo guhura n’ikibazo cyo kutagira ubushake bwo gukora imibonano mpuzabitsina bigabanuka.

Mu bushakashatsi bwakorewe ku bagabo bakuze, bakoze imyitozo ngororamubiri mu gihe cy’amezi icyenda bwerekanye ko nyuma y’icyo gihe bagize ubushake bwo gutera akabariro, bakumva baryohewe n’igikorwa cy’imibonano mpuzabitsina.

CNN itangaza ko mu bagore bakoreweho ubushakashatsi byagaragaye ko abakora siporo cyane bishimira, bakanararikira imibonano mpuzabitsina kurusha abahora bicaye.

Muri ubu bushakashatsi budasanzwe bwakorewe ku bagore bato aho batwaraga igare iminota 20 bakanareba filimi z’urukozasoni, bwerekanye ko byatumye bagira ubushake bwinshi bwo gukora imibonano mpuzabitsina kurusha abarebye izo filimi batabanje gukora iyo myitozo. Ibi byakusanyijwe hifashishijwe akuma gapima uko amaraso atembera mu gitsina cy’umugore.

Abahanga bakoze ubu bushakashatsi bagaragaje ko ku mugabo n’umugore, iyo akora imyitozo bituma amaraso atembera neza mu mubiri, bikanatuma ingingo zose zikorana imbaduko.

Abakora imyitozo nibo bakunze kugaragaza ubushake bwo gukora imibonano mpuzabitsina kandi bakabikorana umurava babyishimiye.

Gukora imyitozo ngororamubiri y’ingufu bishobora kongera imisemburo ya testosterone ukorwa n’udusabo tw’intangangabo n’utw’intangangore, ishobora gukangura ubushake bwo gukora imibonano mpuzabitsina mu bagabo n’abagore.

Ubu bushakatsi bugaragaza ko gukora imyitozo cyane nabyo bishobora kugira ingaruka itari nziza ku mubiri.

Igihe cyo gukora imibonano mpuzabitsina kigendana n’uburyo abakirimo biyumva rimwe na rimwe bituma hari abagitindamo, abandi bakakirangiza mu kanya nk’ako guhumbya.

TANGA IGITEKEREZO KURI IYI NKURU