Barakikana Pierre usanzwe uzwi nka ‘Muhanuzi’ uherutse gucikwa agatangariza mu muhanda ko hagiye kuba umuhengeri uzatwara ubuzima bwa perezida w’Uburundi Pierre Nkurunziza yatawe muri yombi.

Yatawe muri yombi azira guhanura ko Perezida Nkurunziza agiye gupfa

Uyu mugabo ukomoka muri komini Mpanda mu ntara ya Bubanza afungiwe ahitwa Mvugo nyuma yo kuzenguruka imihanda yose ahanura ko perezida Nkurunziza agiye gupfira mu kiza gikomeye kizatera u Burundi.

Uyu muyoboke w’itorero rya Emmanuel, ubwo yari ku ngoyi yavuze ko ubu buhanuzi bwe bwumviswe nabi n’abayobozi b’inzego zibanze ariko akomeza kwemeza ko ibyo yavuze bizaba nta kabuza.

Abumvise ubuhanuzi bwa Barakikana Pierre bemeje ko yavuze ko mu Burundi hagiye gutera umuhengeri ukomeye uzatwara ubuzima bwa perezida Nkurunziza.

Uyu mugabo yafungiwe bwa mbere ku biro bya polisi bya Nyanza-lac kuwa 29 Gicurasi uyu mwaka yimurirwa muri gerez ya parike ya Makamba kuwa 03 Kamena nkuko ikinyamakuru SOS Medias Burundi kibitangaza.

Guverineri Gad Niyukuri yakoresheje inama atangaza ko uyu mugabo yari agamije kwica umutekano w’igihugu bityo akwiriye koherezwa muri gereza ya Murembwe.

Yagize ati “Ubuhanuzi bw’ibinyoma buhungabanya umutekano w’igihugu.Umushinjacyaha agomba kumujyana muri gereza ya Murembwe.”

TANGA IGITEKEREZO KURI IYI NKURU