Umukinnyi wo hagati mu kibuga ukina asatira izamu, Eden Hazard wakiniraga Chelsea FC yamaze kwerekeza muri Real Madrid yo muri Espagne aho ashobora gutangwaho agera kuri miliyoni £150 ku masezerano y’imyaka itanu.

Ku mugoroba wo kuri uyu wa Gatanu nibwo Chelsea FC yatangaje ko yamaze kumvikana na Real Madrid ndetse n’iyi kipe itangaza ko yaguze Eden Hazard w’imyaka 28.

Amafaranga yaguzwe Eden Hazard ashobora kuzagera kuri miliyoni £150 bitewe n’ibyumvikanwe hagati y’amakipe yombi ndetse biteganyijwe ko azerekanwa nk’umukinnyi mushya wa Real Madrid tariki ya 13 z’uku kwezi.

Uyu musore ukomoka mu Bubiligi, yatsinze ibitego 110 mu mikino 352 yakiniye Chelsea kuva ayigezemo mu 2012 avuye muri Lille yo mu Bufaransa, ayifasha kwegukana Europa League mu cyumweru gishize, aho yatsinze ibitego bibiri ku mukino wa nyuma.

Abinyujije ku rubuga nkoranyamabaga rwa Facebook, Hazard yashimiye abafana ba Chelsea uburyo bamubaniye mu gihe yamaze muri iyi kipe, avuga ko kuyivamo aricyo cyemezo cyamugoye.

Ati” Kuva muri Chelsea ni cyo cyemezo gikomeye mfashe mu gihe maze nkina kugeza uyu munsi. Nishimiye buri kimwe muri Chelsea kandi ndabashimira uko mwanshyigikiye.”

Ku ikubitiro, Real Madrid yishyuye miliyoni £89, aho izongeraho agera muri miliyoni £60 nyuma yo kugura uyu mukinnyi.

Hazard abaye umukinnyi wa gatatu uguzwe na Real Madrid itozwa na Zinedine Zidane nyuma ya Luka Jović na Eder Militao, aho yifuza kandi abandi barimo Neymar na Paul Pogba.

Chelse igurishije uyu mukinnyi mu gihe yamaze gufatirwa ibihano byo kugera muri Mutarama 2020 itagura abakinnyi, ariko ikaba yatanze ubujurire mu rukiko rwa Siporo (CAS).

TANGA IGITEKEREZO KURI IYI NKURU