Kuri iki Cyumweru muri Amerika haratangira umukwabu ukaze wo gufata abimukira badafite ibyangombwa.

Igipolisi gishinzwe abimukira muri Leta Zunze Ubumwe za Amerika kuri iki cyumweru kiratangiza umukwabu karundura wo guta muri yombi abantu baba muri iki gihugu badafite ibyangombwa. Ubusanzwe ibikorwa nk’ibi ntibyatangazwaga mbere mu rwego rwo kwirinda kuburira abo bireba, ariko Perezida Donald Trump ubwe yemeje aya makuru kuri uyu wa Gatanu, itariki 12 Nyakanga.

Perezida Donald Trump yari yabanje gutangaza kuri twitter, hashize ukwezi kurenga, uyu mugambi wo guhiga bukware ibihumbi by’abantu baba muri Amerika badafite ibyangombwa. Yaje gusa nk’uwisubiraho nyuma y’uko abakozi b’urwego rushinzwe abinjira n’abasohoka batatse kubura uburyo.

Kuri iyi nshuro nk’uko tubikesha RFI, Perezida Trump yanatanze itariki iki gikorwa kizatangiriraho. Ati: “Ni igikorwa kinini. Kizatangira ku Cyumweru. Tugiye gufata ibihumbi by’abantu, by’umwihariko abo mu dutsiko tw’abagizi ba nabi. Mbese tuzashaka by’umwihariko abantu babi, ariko tuzanashaka abantu binjiye mu gihugu binyuranyije n’amategeko. Barenze ku mategeko bagomba kugenda,”

Itangazamakuru ryo muri Amerika rikaba rivuga ko imijyi 10 minini muri Amerika ari yo izibandwaho cyane n’igipolisi.

Abademokarate bo bakaba bamaganye iki gikorwa bavuga ko kitari icya kimuntu kandi kitari ngombwa usibye guteza ubwoba mu bimukira.

TANGA IGITEKEREZO KURI IYI NKURU