Lionel Messi yeretswe ikarita itukura ya kabiri gusa amaze kubona kuva yatangira gukina umupira w’amaguru nk’uwabigize umwuga, ubwo ikipe ye ya Argentine yatsindaga Chili ibitego 2-1 mu mukino w’igikombe cyo ku mugabane w’Amerika y’epfo warimo ubushyamirane.

Muri uwo mukino wo guhatanira umwanya wa gatatu mu gikombe cya Copa America wabaye ejo ku wa gatandatu, Messi yahereje umupira Sergio Aguero watsinze igitego cya mbere, mbere yuko Paulo Dybala ashyiramo icya kabiri.

Ariko Messi yeretswe ikarita itukura nyuma yo gushyamirana na Gary Medel, byatumye uyu mukinnyi wa Chili na we yerekwa ikarita itukura.

Arturo Vidal yatsinze penaliti ya Chili yabonetse mu gice cya kabiri cy’umukino, ariko Argentine ikomeza guhatana yegukana uwo mwanya wa gatatu.

Ariko icyagarutsweho cyane nta gushidikanya ko ari ikarita itukura yeretswe Medel na Messi bakavanwa mu kibuga.

Messi, utarigera yerekwa ikarita itukura muri Barcelone kugeza ubu, ikarita imwe gusa yari yareretswe mbere yaho yari iyo mu myaka 14 ishize ubwo yatangiraga gukinira Argentine.

Ubushyamirane, muri uwo mukino warimo ishyaka ryinshi, bwari bwakomeje kugenda bwiyongera, biza guhuhuka habura iminota umunani ngo igice cya mbere kirangire, Messi agaragara nk’uteye inkokora Medel bari bahuriye ku mupira.

Medel yahise yitambika mu isura ya Messi asa nk’umwuzuyemo ubwo bombi bateranaga amagambo, mbere yuko umusifuzi ahagera bose agategeka ko basohoka mu kibuga.

Byabaye nkaho Messi abirenganiyemo, kuko ubwo amashusho yuko byagenze yasubirwagamo Messi atagaragaye asubizanya ubushotoranyi ku byo Medel yari akoze.

Brezili iraza gukina na Peru ku mukino wa nyuma wa Copa Amerika uba kuri iki cyumweru.

TANGA IGITEKEREZO KURI IYI NKURU