Ikipe ya Police Fc yerekanye abakinnyi 10 bashya yaguze izifashisha mu mwaka utaha w’imikino maze Nsabimana Aimable agirwa kapiteni w’iyi kipe, mu gihe Savio yabaye kapiteni wungirije.

Police FC yerekanye abakinnyi 10 bashya yaguze na nimero bazambara

Abakinnyi bose bashya berekanywe bahise bahabwa na nimero bazakoresha mu mwaka w’imikino wa 2019-2020 ni mu muhango wabaye mu gitondo cyo kuri uyu wa Gatatu taliki ya 24 Nyakanga 2019.

Perezida w’ikipe ya police FC, ACP Rangira Jean Bosco, ni we wahaye ikaze aba bakinnyi uko ari 10 ndetse n’abatoza batatu ari bo umutoza mukuru, Haringingo Francis, umwungiriza Rwaka Claude n’umutoza w’abanyezamu Nkuzingoma Ramadhani.

Mu bakinnyi berekanywe harimo amazina amenyerewe cyane hano mu Rwanda, nka Nshuti Dominique Savio wavuye muri APR FC, Mico Justin wakiniraga iyi kipe akaza kwerekeza muri Kenya mu ikipe ya Sofapaka.

ACP Rangira, akaba yabwiye aba bakinnyi kimwe n’abandi basanzwe mu ikipe ko uyu mwaka bafite intego yo kwegukana igikombe kuko bafite buri kimwe cyose.

Abakinnyi bashya ba Police FC n'ubuyobozi bw'ikipe
Abakinnyi bashya ba Police FC n’ubuyobozi bw’ikipe

Umutoza wa Police FC, Haringingo Francis akaba yavuze ko yafashe umwanzuro wo kwambura igitambaro cy’ubukapiteni Ngendahimana Eric wari usanzwe ari kapiteni.

Ngo ajya guhitamo kapiteni yagendeye ku bintu byinshi, ubunararibonye bw’umukinnyi, imyaka, ikinyabupfura n’ibindi, akaba yaratoranyije Nsabimana Aimable nka kapiteni akaba azungirizwa na Nshuti Dominique Savio.

Aimable na Savio bagizwe ba kapiteni b'ikipe
Aimable na Savio bagizwe ba kapiteni b’ikipe

Abakinnyi bose bashya Police FC yerekanye n’amakipe bakiniraga ndetse na nimero bazambara

  • Mico Justin  (Sofapaka –Kenya, 10 )
  • Nshuti Dominique Savio( APR FC, 27)
  • Nduwayo Valeur (Musanze FC, 6)
  • Munyakazi Yussuf (Mukura VS, 20)
  • Ndikumana Magloire (Club Olympic – Burundi, 17)
  • Niyomuboma Emery (Bugesera, 2)
  • Ndoriyobijya Eric (Stand United, 4)
  • Tuyizere Jean Luc (Interforce FC, 26)
  • Ngabonziza Pacifique (Interforce, 19)
  • Ntirushwa Aime (AS Muhanga, 8)
Abakinnyi bose Police FC bazakinisha muri uyu mwaka
Abakinnyi bose Police FC bazakinisha muri uyu mwaka

TANGA IGITEKEREZO KURI IYI NKURU