Umutoza wa Rayon Sports, umunya-Brezil Roberto Oliveira Gonçalves do Carmo wari umaze hafi amezi abiri ari iwabo nyuma y’uko amasezerano ye arangiye ntahite yongerwa, yagarutse muri iyi kipe, aho yasesekaye ku kibuga mpuzamahanga cy’indege cya Kigali mu rukererera rwo kuri uyu wa Gatatu.

Umutoza wa Rayon Sports Robertinho yagarutse I Kigali

Robertinho yakiriwe na Itangishaka Bernard King uherutse kugirwa Umuyobozi Nshingwabikorwa wa Rayon Sports wari kumwe na Karenzi Alex uhagarariye inyungu z’uyu mutoza hamwe n’abandi bafana bake.

Uyu mutoza w’imyaka 59 wafashije Rayon Sports gutwara igikombe cya shampiyona cy’umwaka ushize w’imikino ariko ibiganiro byo kongererwa amasezerano ntibigende neza hagati ye n’ubuyobozi aje kongera guhabwa ikipe ndetse arashyira umukono ku masezerano y’umwaka umwe.

Akigera i Kigali, Umutoza wa Rayon Sports yabwiye itangazamakuru ko yiteguye kongera kubaka ikipe nshya no gukorana n’abatoza bashya bazamwungiriza   bamaze igihe gito basinye amasezerano

Ati “Hari abandi bakinnyi bashya, birasaba gutekereza neza kugira ngo hakinishwe abakinnyi bakwiriye kujya mu kibuga. Ndi hano kugira ngo nongere ntange ibyo mfite byose. Namaze kubona urutonde rw’ abakinnyi bazakina Champions League ariko siyo gusa tugomba kureba n’indi mikino.”

“Si ikibazo kuri njye kuba nakubaka ikipe nshya kuko no mu gihe cyashize narabikoze. Rayon Sports ni ikipe ikinira gutwara igikombe. Umutoza wese utoza muri Rayon Sports aba agomba kumenya ko ari ugutsinda buri mukino.”

Robertinho yari yasubiye iwabo mu ntangiriro z’ukwezi gushize nyuma y’uko ibiganiro byo kongera amasezerano hagati ye na komite yari iyobowe na Muvunyi Paul ntacyo bigezeho.

Umutoza wa Rayon Sports Robertinho yagarutse I Kigali

Yagiye adatoje igikombe cy’Amahoro, ikipe isigaranwa n’uwari umutoza wungirije Wagner do Nascimento Silva wayigejeje muri ½ cy’iri rushanwa, gusa na we ntiyatoza umukino wo guhatanira umwanya wa gatatu kuko watojwe na Mwiseneza Djamal.

Ubuyobozi bushya bwa Rayon Sports buyobowe na Munyakazi Sadate bwafashe icyemezo cyo kugarura uyu mutoza wayihaye igikombe.

Rayon Sports yatangiye kwitegura Al-Hial Club yatomboye mu ijonjora ribanza rya CAF Champions League ndetse izakira umukino ubanza uzaba hagati ya tariki ya 9 n’iya 11 z’ukwezi gutaha.

Robertinho yageze mu Rwanda muri Kamena 2018, afasha Rayon Sports gukora amateka yo kugera muri ¼ cya CAF Confederation Cup, agera muri ¼ cya CECAFA Kagame Cup yabereye muri Tanzania, atsindirwa ku mukino wa nyuma w’igikombe cy’Amahoro 2018 mbere yo kwegukana shampiyona y’umwaka ushize w’imikino wa 2018/19.

IGITEKEREZO 1

TANGA IGITEKEREZO KURI IYI NKURU