Kuri uyu wa Gatanu tariki ya 9 Kanama 2019 ni bwo hatashwe ku mugaragaro inzu ya Kigali Arena ifite ubushobozi bwo kwakira abantu basaga ibihumbi icumi.

Kigali Arena ni inyubako yatangiye kubakwa muri Mutarama uyu mwaka na Sosiyete y’Abanya-Turikiya, Summa Rwanda, ari na yo yubatse Kigali Convention Centre.

Ifite akarusho ko kuba ari inyubako ya mbere nini y’imikino mu Karere ka Afurika y’Uburasirazuba ndetse iri mu icumi za mbere muri Afurika yose.

Ifite ishusho imeze kimwe niya Dakar Arena iherereye i Diamniadio nayo yubatswe na Summa ariko aho bitandukaniye ni uko iyi yo muri Sénégal yakira abantu ibihumbi 15 byicaye neza.

Ifite uburebure bwa metero 18,6 uvuye ku gisenge. Izajya yakira imikino ya Basketball, Volleyball, Tennis na Football ikinirwa mu nzu. Ishobora kwakira ibitaramo, inama mpuzamahanga, ibiterane n’ibindi bikorwa bitandukanye by’imyidagaduro.

Kigali Arena igizwe n’ibice bine (zone), aho buri kimwe gifite abo cyagenewe. Amarembo magari aherereye ahazwi nko mu Migina ku muhanda wa Sport View.

Kimwe mu byatumye hubakwa Kigali Arena ni ukugira ngo u Rwanda rugire ubushobozi bwo kwakira amarushanwa mpuzamahanga y’imikino ikinirwa mu nzu izwi nka Indoor Games.

U Rwanda rwamaze guhabwa kwakira imikino ya nyuma ya Basketball Africa League izatangira muri Werurwe umwaka utaha, igahuza amakipe 12 yo muri Afurika muri iri rushanwa ryashyizweho na NBA.

U Rwanda rwahawe kandi no kuzakira Igikombe cya Afurika cya Basketball mu bagabo, kizaba mu 2021.

2 IBITEKEREZO

TANGA IGITEKEREZO KURI IYI NKURU