Jose Mourinho uri guca ibintu mu kazi k’ubusesenguzi kuri Televiziyo ya Sky Sports yatunguye abatari bacye ubwo yavugaga ko ikipe ya kabiri ya Manchester City [Manchester City B ] yatwara igikombe cya Premier League mbere ya Manchester United yamwirukanye.

Jose Mourinho yakomye mu nkokora Manchester United na Arsenal bitungura benshi

Mourinho wahoze ari umutoza wa Manchester United kuri ubu akaba ari gusesengura imikino kuri televiziyo ya Sky Sports, yaraye avuze ko amakipe abona yatwara shampiyona ari Man City, Tottenham, Liverpool na Man City B (ikipe ya kabiri ya Manchester City).

Yagize ati “Amakipe yatwara igikombe ni 4. Man City, Tottenham, Liverpool na Man City B. Ubwo narebaga ku ntebe y’abasimbura ya Manchester City, nabonye ko abakinnyi batabanje mu kibuga nabo bakomeye ku buryo batwara igikombe.”

Mourinho yavuze ko ariko umupira w’amaguru utungurana, ko hari igihe Arsenal, Chelsea cyangwa Man United zishobora gukora ibyo benshi badatekereza zikigaranzura ibi bigugu.

Abajijwe ku bakinnyi Arsenal yaguze muri uyu mwaka w’imikino, Mourinho yavuze ko rutahizamu Nicolas Pepe ashobora kuzahombera ikipe ya Arsenal kuko akeneye igihe kirekire kugira ngo amenyere.

Mourinho yavuze ko yafashe umwanya yitegereza Pepe abona ko ari umukinnyi w’umuhanga ariko ashobora kuzabura umwanya uhagije wo kumenyera shampiyona.

TANGA IGITEKEREZO KURI IYI NKURU