Lionel Messi, umukinnyi wa FC Barcelona n’ikipe y’igihugu y’Argentine yahagaritswe amezi atatu adakina imikino mpuzamahanga nyuma yo gushinja ruswa ishyirahamwe ry’umupira w’amaguru muri Amerika y’amajyepfo.

Kuri iki gihano kandi, Lionel Messi yaciwe amande y’amadolari y’Amerika 50,000.

Mu mikino ya Copa America yabaye muri uyu mwaka, Messi ntiyishimiye imisifurire. Yavuze ko iri rushanwa ryamaze kugurwa (abaritegura bariye ruswa).

Byatangiriye ku mukino wa 1/2 wahuje Argentine na Brazil, urangira Brazil itsinze ibitego 2 ku busa. Messi n’ishyirahamwe ry’umupira w’amaguru muri Argentine bavuze ko abasifuzi bakoze amakosa menshi. Iri shyirahamwe ryo muri Amerika, CONEMBOL ryavuze ko ibi ari agasuzuguro.

Ku mukino wahuje Argentine na Chile, ubwo aya makipe yahataniraga umwanya wa gatatu, Messi yeretswe ikarita itukura; iba iya kabiri yabonye mu mikino izwi kuva yatangira gukina umupira w’amaguru. Uyu mukino warangiye Argentine itsinze Chile ibitego bibiri kuri kimwe.

Messi yabonye iyi karita nyuma yo gushyamirana na Gary Medel wa Chile ku munota wa 37 w’umukino. Umusifuzi yafashe umwanzuro wo kohereza aba bakinnyi bombi hanze y’ikibuga, abakinnyi, abafana ndetse n’abatoza b’Argentine ntibabyumva neza.

Messi yatangaje ko kwerekwa ikarita itukura bisa n’akagambane Argentine yakorewe, ashinja iri shyirahamwe kugiramo uruhare. Byatumye yanga no kwitabira umuhango wo gushyikiriza abakinnyi imidari, ati: ” Ntabwo tugomba kwifatanya n’abagize uruhare muri iyi ruswa. Baradusuzuguye muri iri rushanwa.” Yavuze ko bibabaje kubona abasifuzi bica umupira w’amaguru kandi bakawuteje imbere.

Igihano cya Messi kizarangira mu Gushyingo. Argentine ifitemo imikino ya gicuti na Chile, Mexique n’Ubudage. Afite iminsi 7 y’ubujurire, yabutsinda kigakurwaho.

TANGA IGITEKEREZO KURI IYI NKURU