Umuhanzi uririmba indirimbo zo kuramya no guhimbaza Imana, Serge Iyamuremye yatangaje ibintu byamubayeho bikamusigira isomo rikomeye ryamuteye guhita yakira agakiza.

Serge yegukanye ibihembo binyuranye muri Gospel nyarwanda

Serge n’umuhanzi ukunzwe cyane mu ruhando rwa Gospel nyarwanda, benshi bakaba baramumenye mu ndirimbo nka ‘Ndikumwe Nawe’, ‘Arampagije’, ‘Biramvura’, ‘Yari Njyewe’, ‘Wandemanye Umutima’ n’izindi nyinshi.

Uyu muhanzi yakomoje ku nzira idasanzwe yanyuzemo mbere yo kwakira agakiza, ndetse anavuga uburyo hari umuhanzi (Kuri ubu uririmba indirimbo z’isi) wamubwiye amagambo akamuhindura cyane agahita yiyemeza kwakira agakiza mu buzima bwe.

Mu kiganiro cyitwa Beyond, umuhanzi Serge yabajijwe ku rugendo rwe rwo kwakira agakiza maze asobanura byinshi mubyo yanyuzemo ndetse n’umurongo wa Bibiliya wamufashije guhinduka.

Serge yagize ati “Nakiriye agakiza ahagana mu mwaka wa 2009 bitewe n’amagambo umuhanzi umwe ntavuga kuri ubu unaririmba indirimbo z’Isi yambwiye. Mbere yaho ubundi nari umuyobozi wa Worship Team, gusa muri icyo gihe naririmbaga kugira ngo bandebe, nkagerageza gukora ibyiza kugira ngo ngaragare neza imbere y’abantu nyamara igitangaje ntanubwo babibonaga.”

Serge Iyamuremye yakomoje ku bintu byamubayeho bikamuviramo kwakira agakiza
Serge ngo mbere yo kwakira agakiza, yaririmbaga kugira ngo abantu bamurebe ndetse bamushime

Yakomeje agira ati “Hari umwe mu bahanzi twaririmbanaga (kuri ubu usigaye aririmba indirimbo z’Isi) yambwiye amagambo numva ndababaye ndetse numva asa nkaho ansuzuguye bitewe nuko ariko nabibonaga muri icyo gihe. Yarambwiye ati ‘Ibintu ukora ntago bidushimisha birutwa naho wabyihorera rwose’ kandi abivugira imbere y’imbaga y’abantu. Icyo gihe natashye nababaye ngeze mu rugo sinzi ukuntu nagiye mu kabati mba nguye kuri Bibiliya, nkiyifungura mba nguye ku murongo wanditse muri Matayo 6:1 ugira uti “Mwirinde ntimugakorere ibyiza byanyu imbere y’abantu kugira ngo babarebe, kuko nimugira mutyo ari nta ngororano muzagororerwa na So wo mu ijuru.” Iryo jambo ryankoze ku mutima mpita mpfukama ndasenga nsaba Imana guhinduka ndetse no kumbabarira. Muri ibyo byose ninaho nakuye indirimbo yanjye yitwa ‘Wandemanye Umutima.’

Serge ahamya ko yakiriye agakiza binyuze ku magambo yabwiye nundi muhanzi

Serge kandi yanavuze ko nubwo aririmba indirimbo z’Imana, ariko rimwe na rimwe ajya yumva indirimbo zisanzwe. Mu bahanzi baririmba indirimbo z’isi akunda yavuze ko yikundira ibihangano bya Nsengiyumva Francois uzwi nka Igisupusupu ndetse n’umuhanzikazi Karasira Clarisse.

TANGA IGITEKEREZO KURI IYI NKURU