Umugabo witwa Nsabimana Straton wo mu Murenge wa Maraba mu Karere ka Huye ari gushakishwa n’inzego z’umutekano kubera icyaha akekwaho, cy’uko  yakubitiye umugore we mu nzira aramwica.

Huye: Umugabo yakubitiye umugore we mu nzira aramwica

Nsabimana w’imyaka 50 akekwaho gukubita umugore we witwa Mukakabayiza Marie w’imyaka 48 y’amavuko; bari basanzwe batuye mu Mudugudu wa Rukeri mu Kagari ka Kabuye.

Amakuru aturuka mu baturanyi avuga ko yakubitiye umugore we mu nzira aho barwanye ku mugoroba wo kuri iki cyumweru ubwo bari mu nzira bavuye kwa nyirasenge wa Mukakabayiza.

Aho kwa nyirasenge bari bahanyoye inzoga barataha bageze mu nzira bararwana umugabo aniga umugore we aramwica.

Umunyamabanga Nshingwabikorwa w’Umurenge wa Maraba, Hakuzimana Jean Baptiste, yavuze ko uwo mugabo yahise aburirwa irengero bakaba bari kumushakisha ku bufatanye n’inzego z’umutekano.

Ati “Akimara kumenya ko yishe umugore we yahise ajya kwihisha ubu turi kumushakisha ku bufatanye n’inzego z’umutekano n’abaturage.”

Umurambo w’uwo mugore wishwe wajyanywe ku Bitaro bya CHUB kugira ngo ukorerwe isuzuma hamenyekane neza icyamuhitanye.

Nsabimana n’umugore we bari bafitanye abana batanu. Nta makimbirane azwi yari asanzwe hagati yabo.

TANGA IGITEKEREZO KURI IYI NKURU