Mashami Vincent Umutoza w’ikipe y’igihugu yatangaje abakinnyi azifashisha ku mukino wo gushaka itike yo kujya mu matsinda ahatanira imikino y’igikombe cy’isi cya 2022.

Mashami Vincent yatangaje abakinnyi azifashisha muri Seychelles

Ku mugoroba wo kuri uyu wa mbere, ni bwo ikipe y’igihugu iri bufate indege yerekeza muri ibi birwa, ahateganyijwe umukino ubanza kuri uyu wa Kane tariki 5 Kanama 2019 uzabera kuri ‘People’s Stadium’ mu mujyi wa Victoria mu birwa bya Seychelles.

Mashami Vincent yatangaje abakinnyi azifashisha muri Seychelles

Abakinnyi bahamagawe bakaba bari bamaze iminsi mu myitozo kuva kuwa kabiri tariki 27 Kanama 2019, aho muri rusange ngo umwuka ari mwiza mu ikipe mbere yo gukina kuri uyu wa kane.

Aganira n’itangazamakuru mbere yo kugenda Mashami Vincent utoza ikipe y’igihugu yagize ati:

“Tumaze iminsi irindwi mu myitozo yari imyitozo ikomeye kuko twakoraga kabiri ku munsi. Dusoje imyitozo yanyuma mbere yo kwerekeza muri Seychelles aho tugiye gushakira itike”.

Mu bakinnyi 25 bari bitabajwe, Jacques Tuyisenge ntabwo yakoze imyitozo ariko azahurira hamwe na bagenzi be muri Seychelles mu gihe Salomon Nirisarike we atazaza kubera ko ari bwo yarimo ahindura ikipe akaba yarasabye abatoza ko baba bamuretse.

Hejuru y’aba, hakaba hari abandi bakinnyi bane, Buteera Andrew, Mico Justin, Iradukunda Eric na Manishimwe Djabel bari buze gusigara nubwo bari bamaze iminsi mu myitozo nkuko umutoza Mashami yabitangaje.

Ati: “Mu busanzwe mu majonjora ya FIFA twemerewe kujyana abakinnyi kugera kuri 23 ariko ku mpamvu ntatangaza aha hari bane tuzasiga ino. Gusa nituva muri Seychelles tuzabasanga ino tukomezanye kwitegura umukino wo kwishyura hamwe n’umukino w’amajonjora ya CHAN tuzahuriramo na Ethiopie”.

Kapiteni w’ikipe y’igihugu Haruna Niyonzima yatangaje ko abanyarwanda bakwiye gushyigikira ikipe yabo kuko hari icyizere mu mukino wa Seychelles, mu gihe Rwatubyaye Abdoul we yatangaje ko uko byagenda kose bazatsindira mu birwa.

Ati: Amakipe nk’aya biba bigoye kubona amakuru yayo. Icyo twumvise ni uko mu mikino baheruka gukina batsinzwemo ibitego 16. Si icyo twagenderaho kuko ni ikipe nziza iyo ikinira iwabo. Gusa icyo twakwizeza abanyarwanda ni uko tuzatsinda uko byagenda kose tugatahana amanota atatu.

Mashami Vincent yatangaje abakinnyi azifashisha muri Seychelles

Biteganyijwe ko ikipe y’igihugu igenda na Rwanda Air ku i saa munani (2:00am) za mu gitondo cyo kuri uyu wa kabiri aho iri bugere muri Seychelles ku masaha ya nyuma ya saa sita zo kuri uwo munsi.

Abakinnyi 20 berekeje muri Seychelles

  1. Ndayishimiye Eric.
  2. Kimenyi Yves
  3. Rwabugiri Omar.
  4. Manzi Thierry
  5. Bayisenge Emery
  6. Rwatubyaye Abdoul
  7. Imanishimwe Emmanuel.
  8. Ombolenga Fitina
  9. Rutanga Eric
  10. Mukunzi Yannick
  11. Niyonzima Olivier
  12. Bizimana Djihad
  13. Muhire kevin
  14. Haruna Niyonzima
  15. Iranzi Jean Claude
  16. Sugira Erneste
  17. Medie Kagere
  18. Tuyisenge Jack
  19. Hakizimana Muhadjiri
  20. Sibomana Patrick.

IGITEKEREZO 1

TANGA IGITEKEREZO KURI IYI NKURU