Urubanza rw’abashinjwa kurigisa akayabo ka amamiliyoni yo mu itorero rya ADEPR rwasubitswe kubera kubura umwe mu baburanyi ureganwa na bagenzi be.

Urubanze rw'abaregwa kurigisa amafaranga ya ADEPR rwasubitswe

Tariki 6 Nzeri 2019, nibwo hari hateganyijwe urubanza rw’ubujurire rw’abahoze ari abayobozi b’Itorero ADEPR bagera kuri 12 barimo Bishop Sibomana wari Umuvugizi w’iri torero na Tom Rwagasana wari umwungirije. Uru rubanza rwasubitswe bitewe no kubura k’umwe mu baburanyi ureganwa nabo.

Uyu wabuze agatuma urubanza rusubikwa ni uwitwa Mukabera Mediatrice uri muri batatu bari bahamwe n’ibyaha, agakatirwa n’urukiko maze nabo bagahita bajuririra imikirize y’urubanza.

Ni urubanza rwagombaga kubera ku rukiko Rukuru mu gitondo cyo ku wa Gatanu, aho aba bose uko ari 12 bagombaga kuburana ku byaha byo kurigisa umutungo, gukoresha nabi umutungo ufitiye rubanda inyungu, guhimba no gukoresha inyandiko mpimbano.

Abatumijwe n’urukiko ni Mukabera Mediatrice; Beninka Bertin; Rwagasana Thomas, Nzabarinda Tharcisse; Mukakamari Lynea; Sindayigaya Theophile; Niyitanga Salton; Twizeyimana Emmanuel; Mutuyemariya Christine; Sibomana Jean; Sebagabo Muyehe Leonard na Gasana Valens.

Aba bose baregwa ibyaha birimo icyo kurigisa umutungo ungana na 2 530 395 614 Frw yagombaga kwishyura umwenda wa BRD no kubaka Dove Hotel, gukoresha nabi umutungo ufitiye rubanda inyungu, guhimba no gukoresha inyandiko.

Mu Ukuboza 2018 nibwo umucamanza yari yanzuye ko ababuranyi 9 muri 12 barimo Sibomana Jean, Tom Rwagasana bagomba kurekurwa kuko yagaragazaga ko badahamwa n’ibyaha bari bakurikiranweho. Icyo gihe ADEPR ntiyanyuzwe n’imikirize y’urubanza kuko yahise ijuririra icyo cyemezo.

Hari amakuru kandi avuga ko Itorero rya ADEPR ryigeze kwandikira Perezida w’Urukiko rw’Ubujurire rimusaba ko urubanza bajuriyemo rwazaburanishwa n’inteko irenze Umucamanza umwe, bitewe n’uko urubanza ruregwamo abantu benshi, kandi baregwa kunyereza umutungo w’Itorero.

TANGA IGITEKEREZO KURI IYI NKURU