Kuri uyu wa mbere tariki ya  30 Nzeri 2019, Minisiteri y’Uburezi ku nkunga ya Ambasade y’Abongereza mu Rwanda, batangije gahunda y’uko buri  mwana wese  wiga mu Rwanda mu mashuri abanza agiye kubona igitabo cyo kwigiramo k’Icyongereza ndetse n’ik’Imibare.

Minisiteri y’uburezi igiye gutanga ibitabo by’Icyongereza n’Imibare kuri buri mwana mu mashuri abanza

Iyi  gahunda  yatangijwe yatangijwe ku mugaragaro n’Umunyamabanga wa Leta muri Minisiteri y’Uburezi ushinzwe Amashuri y’Incuke, abanza n’ayisumbuye, Dr. Isaac Munyakazi.

Uyu muhango watangirijwe  mu Rwunge rw’Amashuri rwa Camp Kanombe mu Karere ka Kicukiro ho  mu mugi wa Kigali, wari witabiriwe n’abayobozi b’ibigo by’amashuri byo mu Karere ka Kicukiro, abarimu, ubuyobozi bw’Ikigo k’Igihugu gishinzwe uburezi, REB, uhagarariye Ambasade y’Abongereza mu Rwanda ndetse n’Ubuyobozi n’abakozi b’Ikigega cy’u Bwongereza gishinzwe iterambere mpuzamahanga (DFID) mu Rwanda, ari nacyo cyateye inkunga u Rwanda mu gukora no gukwirakwiza ibyo bitabo mu mashuri yose yo mu Rwanda.

Mu kiganiro n’itangazamakuru, Dr. Munyakazi  yagize ati: “kuba buri munyeshuri mu mashuri abanza agiye kubona igitabo cye bwite k’Icyongereza ndetse n’ik’Imibare ariho  bubakira  umusingi w’Uburezi twifuza , kandi  ukaba umusingi ushingiye no ku ndimi , gusoma no kwandika tutibagiwe no kubara.”

“Mu gusoma no kwandika twashyize imbaraga mu Kinyarwanda no mu ndimi z’amahanga. Mu cyongereza by’umwihariko tubifashijwemo n’abafatanyabikorwa b’Abongereza, ni hamwe muho dushyira imbaraga kuko mu mwaka wa kane kuzamuka kugeza muri Kaminuza amasomo yose yigishwa mu rurimi rw’Icyongereza”.

Minisitiri Munyakazi yakomeje avuga ko ibitabo byunganira mwarimu kandi ko ari byiza kuba hafunguwe ku mugaragaro igikorwa cyo kugeza ibitabo kuri buri mwana w’Umunyarwanda, igitabo ke bwite k’Icyongereza n’ik’Imibare. Yagarutse ku kamaro ko kwigisha imibare ku mwana ukiri muto.

Yagize ati “Imibare ni ingenzi cyane kuko kwigisha umwana imibare biba bimufungurira kuzavamo umuganga, Enjeniyeri (Engineer) mbese umuntu w’ubumenyi butandukanye mu bijyanye n’imibare kandi imibare ntabwo umuntu ayiga akuze bisaba ko utangirana nayo ukayitoza ukiri hasi ari nayo mpamvu muri uyu mushinga hatangwamo ibitabo by’imibare kuri buri mwana ariko by’umwihariko hagomba kubaho guhugura abarimu b’imibare kuko umushinga uzagera ku barimu bose bo mu Rwanda batozwa kwigisha Icyongereza ndetse n’Imibare”.

Ambasaderi w’ubwami bw’u Bwongereza mu Rwanda, Joanne Lomas, yavuze ko Igihugu cy’u Bwongereza kiyemeje gushyigikira uburezi bw’abana b’Abanyarwanda aho batera inkunga imishinga inyuranye igamije guha umwana w’Umunyarwanda uburezi bufite ireme.

Yavuze ko umushinga bafitanye na Minisiteri y’Uburezi uzatwara miriyoni z’amayero zigera kuri 7 na miriyoni magana inani, angana na miriyari zisaga 7 z’Amanyarwanda. Ibitabo byakozwe by’Icyongereza n’Imibare bikaba bingana na miriyoni 3 n’ibihumbi 800.

Umurerwa Jack, Umuybozi w’Urwunge rw’Amashuri rwa rwa Camps Kanombe, yishimiye kuba igikorwa cyo gutangiza gahunda yo gukwirakwiza ibitabo by’Icyongereza n’Imibare mu mashuri byatangiriye mu Kigo ayobora, avuga ko nabo bagiye kubyaza umusaruro ibyo bitabo babahaye.

Minisiteri y’uburezi igiye gutanga ibitabo by’Icyongereza n’imibare kuri bu mwana

Yagize ati “Ubundi twakoreshaga uburyo bwo gutizanya ibitabo ku buryo abana bane cyangwa batanu basangiraga igitabo kimwe. Kuri ubu dufite amahirwe akomeye kuko buri mwana abonye igitabo ke. Bizorohera mwarimu kwigisha ndetse byorohere n’umunyeshuri kwiga kuko aba yiga afite ibikoresho by’ibanze”.

Akomeza avuga ko ibitabo bahawe babitegerejeho umusaruro mwiza kuko umwana yigishwaga abwirwa ibintu byose ariko yava ku ishuri ntabone uko yongera gusubiramo ibyo yigishijwe, none igitabo ni icy’umunyeshuri azajya agitahana agakomeza kwiyigisha ndetse n’umubyeyi akaba yamufasha mu rugo afite aho byanditse neza atari gukura mu ikaye aho umwana yanditse.

TANGA IGITEKEREZO KURI IYI NKURU