Perezida Museveni yategetse ko abantu bose batawe muri yombi kubera imyitwarire y’ubunebwe no guteza akavuyo, inzererezi zose harekurwa, hagendewe ku itegeko ryo mu gihe cy’ubukoloni.

Perezida Museveni yategetse ko inzererezi zose zifungurwa

Umukuru wa polisi Martin Okoth Ochola yandikiye abakuru ba polisi mu turere, abategeka gukurikiza iryo tegeko rya Perezida.

Mu cyegeranyo cyo mu mwaka wa 2016, umuryango utegamiye kuri leta uharanira uburenganzira bwa muntu wa Human Rights Awareness and Promotion Forum, wavuze ko abo batawe muri yombi kubera “amategeko ahana inzererezi” yo mu gihe cy’ubukoloni bw’Abongereza.

Ahanini ayo mategeko yibasiraga abakene badafite aho kuba hahoraho cyangwa badafite akazi.

Uwo muryango wongeyeho ko ubushakashatsi bwagaragaje ko abantu 958 batawe muri yombi hagendewe kuri ayo mategeko hagati ya 2011 na 2015, kuri sitasiyo eshanu za polisi zakoreweho ubwo bushakashatsi.

Perezida Museveni yanategetse ko mu gihe kiri imbere nta muntu n’umwe wongera gutabwa muri yombi kubera ayo mategeko, nkuko bitangazwa n’ikinyamakuru cyaho Daily Monitor kitegamiye kuri leta.

Ubu bubaye ubwa gatatu Museveni atanze itegeko nk’iri, ubuheruka hakaba hari mu ijambo yagejeje ku baturage ba Uganda mu mwaka wa 2017.

Museveni yigeze gusezeranya gukuraho itegeko rigira icyaha gihanwa kuba “umunebwe no guteza akavuyo”, ariko iryo sezerano ntabwo ararisohoza.

Ochola yavuze ko Perezida Museveni yanategetse ko hafungurwa inzererezi zifungiye mu murwa mukuru Kampala kubera kunanirwa kwishyura amande angana na miliyoni imwe y’amashilingi (250,000Frw).

Izi nzererezi zivugwa ni bamwe mu bantu bafashwe bacururiza mu mihanda mu buryo bunyuranyije n’amategeko, nkuko Daily Monitor ibitangaza.

TANGA IGITEKEREZO KURI IYI NKURU