Mu Bwongereza umushoferi w’ikamyo witwa Maurice Robinson araregwa kwica abantu 39 basanzwe bapfuye mu gice gikonjesha cy’imodoka y’ikamyo.

Umushoferi araregwa kwica abantu 39 mu Bwongereza

Maurice Robinson w’imyaka 25 yatawe muri yombi araregwa kwica abantu, ni nyuma yaho imirambo y’abagabo 31 n’abagore umunani isanzwe ahitwa Grays mu Bwongereza ku wa gatatu w’iki cyumweru.

Anaregwa kandi ubucuruzi bw’abantu ndetse n’ibyaha bijyanye no kwinjiza abantu mu gihugu no gukoresha amafaranga yabonywe mu buryo butemewe n’amategeko, nkuko polisi ikorera mu karere ka Essex ibivuga.

Bwana Robinson ukomoka i Craigavon muri Irelande y’amajyaruguru, biteganyijwe ko agezwa imbere y’urukiko rwa Chelmsford Magistrates’ Court ku wa mbere.

Abandi bantu batatu  barimo umugabo n’umugore bombi b’imyaka 38 bo mu mujyi wa Warrington mu Bwongereza  ndetse n’umugabo w’imyaka 48 ukomoka muri Irelande y’amajyaruguru baracyari mu maboko ya polisi.

Uko ari batatu batawe muri yombi bacyekwaho ubwicanyi ndetse no gucura umugambi wo gucuruza abantu.

Umugabo uri mu kigero cy’imyaka 20 yatawe muri yombi na polisi yo muri Irelande mu murwa mukuru Dublin nk’umuntu “wo gukurikiranira hafi” bijyanye n’iperereza rya polisi yo mu karere ka Essex mu Bwongereza.

Mbere, polisi yavuze ko ibikorwa byo gutahura umwirondoro w’abo bantu 39 bishwe biri kwibanda ku kureba ko baba bakomoka muri Vietnam.

Abapolisi bavuze ko habayeho “ubusabe bwinshi” bw’abaturage bo muri Vietnam kuva iyo mirambo yaboneka mu masaha yo mu rukerera yo ku wa gatatu w’iki cyumweru.

Abapolisi bavuga ko ubu imirambo yose ubu yavanwe muri icyo gice cy’ikamyo kandi ko ibizamini byo kwa muganga byo gutahura icyabishe biri gukorwa.

Polisi ivuga ko abo bishwe bari bafite ibyangombwa “bicye cyane”, kuburyo abapolisi byabasabye kugenda bareha aho baba bakoze n’intoki zabo, ibizamini bya DNA ndetse n’ibibaranga by’umwihariko nko kwishushanyaho ku mubiri (tattoos) cyangwa inkovu.

TANGA IGITEKEREZO KURI IYI NKURU